الماتى مەملەكەتتىك تابيعي قورىعىندا فوتوكاقپان تيان-شان قوڭىر ايۋلارىنىڭ ومىرىنەن بىرەگەي كادرلاردى ءتۇسىرىپ الدى. بەينەجازبانى ەكولوگيا جانە تابيعي رەسۋرستار مينيسترلىگى جاريالادى، دەپ حابارلايدى infohub.kz.
«بۇل بىرەگەي ساتتەر قوڭىر ايۋدىڭ تابيعي تىرشىلىگىنە ۇڭىلۋگە، ونىڭ جابايى تابيعاتتاعى مىنەز-قۇلقى مەن ءومىر سالتىمەن تانىسۋعا مۇمكىندىك بەرەدى»، — دەلىنگەن ۆەدومستۆو حابارلاماسىندا.
تيان-شان قوڭىر ايۋى — قوڭىر ايۋدىڭ سيرەك كەزدەسەتىن، وقشاۋلانعان كىشى ءتۇرى. ول قازاقستاننىڭ قىزىل كىتابىنا جانە حالىقارالىق قىزىل كىتاپقا ەنگىزىلگەن. بۇل جانۋارلار سالىستىرمالى تۇردە كىشىرەك كولەمىمەن ەرەكشەلەنەدى: دەنە ۇزىندىعى 1،5–2،2 مەتر، سالماعى 135–200 كەلى، دەگەنمەن ىرىرەك دارالارى دا كەزدەسەدى. باسقا تۇرلەردەن ايىرماشىلىعى — الدىڭعى اياقتارىنداعى ۇزىن اشىق ءتۇستى تىرناقتارى.
تيان-شان قوڭىر ايۋى — جان-جاقتى قورەكتەنەتىن جانۋار: ونىڭ راسيونىنا شوپتەر، تامىرساباقتار، پيازشىقتار، جەمىستەر مەن جيدەكتەر كىرەدى. كەيدە ول سۋىرلار مەن شاقىلداقتاردى اۋلايدى، ولەكسەدەن دە باس تارتپايدى. تولدەۋ قىستا ىندە وتەدى، ادەتتە 1–2 كۇشىك تۋادى.
جازعى كەزەڭدە تيان-شان قوڭىر ايۋى بەلسەندى تىرشىلىك ەتىپ، قىستا جۇمسالعان كۇشىن قالپىنا كەلتىرەدى جانە مامىر قورىن جينايدى. ايۋ كوبىنەسە تاڭەرتەڭ ەرتە جانە كەشكى سالقىن ۋاقىتتا ازىق ىزدەپ شىعادى. جازدا ايۋلار نەگىزىنەن وزەندەر مەن كولدەردىڭ جانىندا، قالىڭ ورمانداردا جانە الپىلىك شالعىنداردا مەكەندەيدى. ىستىق كۇندەرى ولار سالقىن، كولەڭكەلى جەرلەردە، سونداي-اق بۇلاقتار مەن وزەن جاعالاۋلارىندا دەمالىپ جاتادى.
بۇعان دەيىن «كۋرسيۆ» ءۇستىرت قورىعىندا فوتوكاقپانداردىڭ سيرەك كەزدەسەتىن بارىستى تۇسىرگەنىن جازعان ەدى.