حالىقارالىق جاساندى ينتەللەكت وليمپياداسىنىڭ اشىلۋ سالتاناتىندا Freedom Holding Corp. باس ديرەكتورى تيمۋر تۋرلوۆ ءسوز سويلەپ، استانا الداعى كۇندەرى الەمدىك جاساندى ينتەللەكت استاناسىنا اينالاتىنىن، ال تەحنولوگيالاردىڭ دامۋ قارقىنى شاعىن كومانداعا نەمەسە ءتىپتى ءبىر ادامعا تۇتاس كورپوراسيالاردىڭ مىندەتتەرىن اتقارۋعا مۇمكىندىك بەرەتىنىن ايتتى، دەپ حابارلايدى infohub.kz.
جاڭا شىندىققا بەيىمدەلۋدىڭ مىسالى رەتىندە تۋرلوۆ سيفرلىق قۇرالدارمەن بىرگە ءوسىپ كەلە جاتقان جاس قازاقستاندىق شاحماتشىلاردىڭ جەتىستىكتەرىن كەلتىردى. ول قازاقستان ەل باسشىلىعىنىڭ شەشىمدەرىنىڭ ارقاسىندا جاھاندىق ترەندتىڭ ءدال ورتاسىندا تۇرعانىن اتاپ ءوتتى.
«بۇل — ءبىزدىڭ ەلىمىزدىڭ ۇلتتىق كۇن ءتارتىبى مەن ونىڭ باسشىلىعىنىڭ شەشىمدەرى الەمدىك ترەندتەرگە جاي عانا جاۋاپ بەرىپ قويماي، ولاردى قالىپتاستىرۋعا كومەكتەسەتىن سيرەك جاعدايلاردىڭ ءبىرى. Freedom كومپانياسىندا ءبىز بۇل كوزقاراستى قولدايمىز. NVIDIA جانە جاساندى ينتەللەكت جانە سيفرلىق دامۋ مينيسترلىگىمەن بىرلەسىپ، ءبىز ەلىمىزدىڭ جوعارى وقۋ ورىندارىندا جاساندى ينتەللەكت زەرتحانالارىن قۇرۋعا كومەكتەسەمىز، سونىمەن قاتار قازاقستاننىڭ ءبىلىم بەرۋ جۇيەسىنە جەتەكشى جاساندى ينتەللەكت قۇرالدارىنا 165 مىڭ ليسەنزيا بەردىك»، — دەدى ول.
سپيكەر كومپانيانىڭ ىشكى تاجىريبەلەرىمەن ءبولىسىپ، الگوريتمدەردىڭ ءوزى ادام فاكتورىنسىز پايداسىز ەكەنىن كورسەتتى: نەيروجەلىلەرگە بىردەي قولجەتىمدىلىگى بار ەكى ازىرلەۋشىلەر كومانداسىنىڭ ىشىندە ونىمدىلىكتىڭ ماكسيمالدى وسۋىنە (90%-عا دەيىن) تەك جۇمىس پروسەستەرىن تولىق قايتا قۇرعاندار عانا جەتتى.
«قورىتىندى وتە قاراپايىم: تەحنولوگيالاردىڭ ءوزى قۇندىلىق جاسامايدى. ونى ادامدار جاسايدى. جاساندى ينتەللەكتپەن ۇيلەسكەن ادام الەۋەتى جاساندى ينتەللەكتىنىڭ وزىنەن كۇشتى. باسەكە تابيعي رەسۋرستار ءۇشىن ەمەس، تالانتتار ءۇشىن بولىپ جاتقان الەمدە جاستارعا سالىنعان ينۆەستيسيا — كەز كەلگەن ەل نەمەسە كومپانيا جاساي الاتىن ەڭ سەنىمدى ينۆەستيسيا»، — دەپ جەتكىزدى ول.
ءسوزىنىڭ سوڭىندا تيمۋر تۋرلوۆ ءارتۇرلى ەلدەردەن كەلگەن جاس وليمپياداشىلاردى جارىستى تەك مەدال ءۇشىن عانا ەمەس، بولاشاق سەرىكتەستەر مەن جاڭا تەحنولوگيالىق جوبالاردىڭ نەگىزىن قالاۋشىلاردى ىزدەۋ ءۇشىن دە پايدالانۋعا شاقىردى.