كاسپي تەڭىزىنىڭ جاعالاۋىندا توتەنشە جاعدايلار مينيسترلىگى قىزمەتكەرلەرى مەن ولاردىڭ وتباسىلارىنا ارنالعان «112 Resort Aktau» دەمالىس ورتالىعى جۇمىسىن باستادى. بۇل قازاقستانداعى العاشقى ۆەدومستۆولىق كۋرورت، دەپ حابارلايدى infohub.kz سايتى.
جوبا اياسىندا 45 زاماناۋي كاپسۋلالىق ءۇي ورناتۋ جوسپارلانعان. ونىڭ جەتەۋى قونىستانۋعا تولىق دايىن: ولار وتباسىلىق دەمالىسقا ەسەپتەلگەن جانە بارلىق قاجەتتى تۇرمىستىق تەحنيكامەن جابدىقتالعان.
ورتالىق اۋماعىندا وتكىزۋ پۋنكتى، اكىمشىلىك عيمارات، مەيرامحانا، بالالار ويىن الاڭى، ەكى سۋبۇرقاق، تەڭىز سۋى ۇزدىكسىز اينالىپ تۇراتىن باسسەين، اشىق دۋش، پيرس، باربەكيۋ ايماعى، ءدامحانا جانە اۆتوكولىك تۇراعى جابدىقتالعان.
«اۋماق اباتتاندىرىلعان: اسفالت جولدار مەن جاياۋ جۇرگىنشىلەر جولدارى سالىنىپ، سىرتقى جارىقتاندىرۋ ورناتىلىپ، كوگالداندىرۋ جۇمىستارى جۇرگىزىلىپ، اعاشتار وتىرعىزىلدى. دەمالىس ورتالىعى قاجەتتى ينجەنەرلىك-كوممۋنيكاسيالىق ينفراقۇرىلىممەن تولىق قامتاماسىز ەتىلگەن»، — دەپ اتاپ ءوتتى تجم.
دەمالۋشىلاردىڭ قاۋىپسىزدىگىن قامتاماسىز ەتۋ ءۇشىن ماڭعىستاۋ وبلىسى تج دەپارتامەنتىنىڭ جەدەل-قۇتقارۋ جاساعى مەن اپاتتار مەديسيناسى ورتالىعىنىڭ قىزمەتكەرلەرىنە ارنالعان جەكە ءۇي سالىنعان. ولار تاۋلىك بويى كەزەكشىلىك اتقارادى.
ورتالىقتىڭ العاشقى قوناقتارى كۋرورت ايماعىن سالۋ مەن اباتتاندىرۋعا قاتىسقان قۇتقارۋشىلار، ءورت سوندىرۋشىلەر جانە ولاردىڭ وتباسى مۇشەلەرى بولادى.