كرەاتيۆتى ەكونوميكا كۇندەرى اياسىندا تمد-دا ۇزدىك ديزاينەرلەر مەن تىگىنشىلەر تاڭدالادى. بۇل شارا 2026 جىلدىڭ 28–30 قازانى ارالىعىندا وتەدى. حالىقارالىق سىيلىق بۇكىل دوستاستىقتاعى ءسان جانە جەڭىل ونەركاسىپ ماماندارىن بىرىكتىرەدى، دەپ حابارلايدى infohub.kz سايتى.
«كرەاتيۆتى ەكونوميكا كۇندەرى 2026 جىلدىڭ 28–30 قازانىندا ءوتىپ، تمد ەلدەرىنىڭ ءسان، جەڭىل ونەركاسىپ جانە كرەاتيۆتى ەكونوميكا وكىلدەرى ءۇشىن كاسىبي قارىم-قاتىناستىڭ جاڭا الاڭىنا اينالادى»، — دەلىنگەن تمد اتقارۋشى كوميتەتى حابارلاماسىندا.
بۇل ءىس-شارا «ءسان دوستاستىعى» حالىقارالىق فورۋمىنىڭ جالعاسى بولادى. ول جەتەكشى ديزاينەرلەردى، وندىرۋشىلەردى، كاسىپكەرلەردى، ءبىلىم بەرۋ ۇيىمدارىنىڭ، مەملەكەتتىك ورگانداردىڭ جانە دامۋ ينستيتۋتتارىنىڭ وكىلدەرىن بىرىكتىرەدى.
«باعدارلامانىڭ باستى وقيعالارىنىڭ ءبىرى — ارنايى سىيلىقتى تابىستاۋ. ونىڭ لاۋرەاتتارى ديزاينەرلەر، جەڭىل ونەركاسىپ كاسىپورىندارىنىڭ باسشىلارى، وقىتۋشىلار، ءبىلىم بەرۋ ۇيىمدارىنىڭ قىزمەتكەرلەرى جانە كيىم، اياق كيىم، اكسەسسۋارلار جاساپ، زاماناۋي كرەاتيۆتى يندۋستريالاردى دامىتىپ جۇرگەن ستۋدەنتتەر بولا الادى»، — دەپ مالىمدەدى تمد اتقارۋشى كوميتەتىندە.
وتىنىمدەر قابىلداۋ باستالدى. قۇجاتتاردى «ءسان دوستاستىعى» جوباسىنىڭ رەسمي سايتى ارقىلى 2026 جىلدىڭ 30 قىركۇيەگىنە دەيىن تاپسىرۋعا بولادى. بايقاۋ ىرىكتەۋى 2026 جىلدىڭ 20 شىلدەسى مەن 5 قازانى ارالىعىندا وتەدى، سودان كەيىن ساراپشىلار قازىلار القاسى جەڭىمپازداردى انىقتايدى. قاتىسۋ ءۇشىن جوبانىڭ رەسمي سايتىندا ءوتىنىمدى تولتىرۋ قاجەت.
جەڭىمپازدار التى نەگىزگى نوميناسيا بويىنشا انىقتالادى: «يننوۆاسيالىق ءوندىرىس»، «جىل ديزاينەرى»، «جەڭىل ونەركاسىپ جانە ءسان يندۋسترياسى سالاسىنداعى اعارتۋشىلىق جوبا»، «سالاۋاتتى ءسان سالاسىنداعى جوبا»، «جەڭىل ونەركاسىپ سالاسىنداعى ۇزدىك جۇمىس بەرۋشى»، «ۇزدىك ستۋدەنتتىك جوبا». سونىمەن قاتار، ەكى ارنايى نوميناسيا قاراستىرىلعان — «حالىقارالىق ىنتىماقتاستىقتى دامىتۋعا قوسقان ۇلەسى ءۇشىن» جانە «جەڭىل ونەركاسىپ پەن كرەاتيۆتى يندۋستريالارداعى ۇزدىك الەۋمەتتىك جوبا ءۇشىن».
«ءار سانات ءۇشىن وزىندىك باعالاۋ كريتەريلەرى ازىرلەنگەن. ماسەلەن، «جىل ديزاينەرى» نوميناسياسى بويىنشا جەڭىمپازدى انىقتاۋ كەزىندە قازىلار القاسى كوللەكسيانىڭ ەرەكشەلىگى مەن كوركەمدىك قۇندىلىعىن، ديزاينەرلىك شەشىمدەردىڭ وزەكتىلىگىن، نارىقتىڭ زاماناۋي ۇردىستەرىنە سايكەستىگىن، بۇيىمداردىڭ ورىندالۋ ساپاسىن جانە بولشەكتەردىڭ پىسىقتالۋ دەڭگەيىن ەسكەرەدى»، — دەپ اتاپ ءوتتى بايقاۋدى ۇيىمداستىرۋشىلار.
سىيلىقتىڭ باستى ماقساتى — ءسان جانە جەڭىل ونەركاسىپ يندۋسترياسىنىڭ بولاشاعىن قالىپتاستىراتىن، يننوۆاسيالىق تاسىلدەردى ەنگىزەتىن، سۇرانىسقا يە ونىمدەردى جاسايتىن جانە تمد كەڭىستىگىندە كرەاتيۆتى ەكونوميكانىڭ دامۋىنا ىقپال ەتەتىن مامانداردى قولداۋ ەكەنى ايتىلدى.
ۇيىمداستىرۋشىلار جاس تالانتتارعا ەرەكشە كوڭىل بولمەك. سىيلىق ولاردىڭ شىعارماشىلىق الەۋەتىن اشۋعا، كاسىبي ءوسۋ مۇمكىندىكتەرىن كەڭەيتۋگە، زاماناۋي ديزايندى تانىمال ەتۋگە، سونداي-اق ءارتۇرلى ەل وكىلدەرى اراسىنداعى ىنتىماقتاستىقتى نىعايتۋعا كومەكتەسەدى دەپ كۇتىلۋدە.
كرەاتيۆتى ەكونوميكا كۇندەرى بيزنەس، مەملەكەتتىك ورگاندار، ءبىلىم بەرۋ مەكەمەلەرى، دامۋ ينستيتۋتتارى جانە كاسىبي قوعامداستىق وكىلدەرىن بىرىكتىرەدى. بۇل الاڭ كرەاتيۆتى يندۋستريالاردىڭ دامۋ بولاشاعىن تالقىلاۋعا، ۇزدىك تاجىريبەلەرمەن الماسۋعا جانە ءسان، ديزاين جانە جەڭىل ونەركاسىپ سالاسىنداعى جاڭا بىرلەسكەن جوبالاردى جۇزەگە اسىرۋعا ارنالادى.
قاتىسۋشىلاردى تىركەۋ 2026 جىلدىڭ 23 قازانىنا دەيىن تمد اتقارۋشى كوميتەتىنىڭ سايتىنداعى سىلتەمە بويىنشا جالعاسادى.