قوستاناي وبلىسىندا توبىل وزەنىنىڭ ارناسىنان زاڭسىز ءىرى كولەمدە قۇم ءوندىرۋ ءىسى بويىنشا تەرگەۋ اياقتالدى. "ستس-سەمەنت" ج ش س باسشىسىنىڭ ارەكەتىنەن كەلتىرىلگەن زالال 719 ملن تەڭگەنى قۇرادى، دەپ حابارلايدى infohub.kz.
قوستاناي وبلىسى بويىنشا قارجىلىق مونيتورينگ اگەنتتىگى دەپارتامەنتىنىڭ مالىمەتىنشە، كومپانيا باسشىسى مەملەكەت بەرگەن جەر قويناۋى ۋچاسكەسىنىڭ سىرتىندا توبىل وزەنىنىڭ تىكەلەي ارناسى مەن جاعالاۋ سىزىعىنان وزەن قۇمىن ونەركاسىپتىك جولمەن ءوندىرۋدى ۇيىمداستىرعان. جۇمىستار گيدرومەحانيكالاندىرىلعان تاسىلمەن، وزەن تۇبىنەن ەكى زەمسناريادتى پايدالانا وتىرىپ جۇرگىزىلگەن. ساتىلعان قۇمنىڭ جالپى كولەمى 113 مىڭ تەكشە مەتردەن اسىپ، سوماسى 719 ملن تەڭگەنى قۇراعان.
زاڭسىز ارەكەت سالدارىنان سۋ جانە جەر رەسۋرستارىنا ەلەۋلى ەكولوگيالىق زالال كەلتىرىلگەن: توبىل وزەنىنىڭ ارناسى وزگەرگەن، جاعالاۋ سىزىعى بۇزىلعان، گيدرولوگيالىق رەجيم بۇزىلعان، باتپاقتانۋ ۋچاسكەلەرى پايدا بولعان. عارىشتىق سۋرەتتەردىڭ دەرەگىنشە، سۋ قورى جەرلەرىنىڭ بۇزىلعان اۋدانى 28 مىڭ شارشى مەتردەن اسقان.
تابيعي كەشەندى قالپىنا كەلتىرۋ ءۇشىن جاعالاۋدى نىعايتۋ، ارنانى تازارتۋ جانە بۇزىلعان جەرلەردى رەكۋلتيۆاسيالاۋ جۇمىستارى قاجەت بولادى. سوت سانكسياسىمەن كۇدىكتىنىڭ مۇلكىنە تىيىم سالىندى: 12 اۆتوكولىك، 10 جەر ۋچاسكەسى جانە تۇرعىن ەمەس ءۇي-جاي. قىلمىستىق ءىس سوتقا جولداندى.