قىزىلوردا وبلىسىندا پوليسيا جول قوزعالىسى ەرەجەلەرىن ورەسكەل بۇزعان توي شەرۋىنە قاتىسۋشىلاردى انىقتادى. 15 ادام جاۋاپكەرشىلىككە تارتىلدى، دەپ حابارلايدى infohub.kz.
ق ر ءىىم «نوۆوستي ءىىم رك» Telegram-ارناسىندا حابارلانعانداي، شەرۋگە قاتىسۋشىلار قارسى باعىتقا شىعىپ، جولدا اۆاريالىق جاعداي تۋعىزىپ، پيروتەحنيكا قولدانعان. وقيعا 23 تامىزعا قاراعان ءتۇنى جاڭاقورعان اۋدانىندا بولعان. كولىكتەردىڭ بىرىندە «براتۆا جەنيحا» دەگەن جازۋ بولعان.
«بارلىق قاتىسۋشىلار انىقتالىپ، پوليسياعا جەتكىزىلدى. ولاردىڭ 21 بەن 35 جاس ارالىعىنداعى 15 ادام — جاڭاقورعان اۋدانى، الماتى جانە جامبىل وبلىستارى، سونداي-اق شىمكەنت تۇرعىندارى ەكەنى انىقتالدى. جاۋاپكەرشىلىككە تارتىلعانداردىڭ ىشىندە 13 جۇرگىزۋشى جانە ەكى جولاۋشى بار»، — دەدى ۆەدومستۆودا.
قۇقىقبۇزۋشىلارعا قاتىستى 56 اكىمشىلىك ءىس قوزعالدى. ولار قارسى باعىتقا شىققانى، اۆاريالىق جاعداي تۋعىزعانى، ءقاۋىپتى مانەۆر جاساعانى، جۇرگىزۋشى كۋالىگىنسىز جانە تەحنيكالىق اقاۋى بار كولىكتى باسقارعانى، ۇساق بۇزاقىلىق جاساعانى، سونداي-اق ەلدى مەكەندە پيروتەحنيكانى زاڭسىز قولدانعانى ءۇشىن جاۋاپكەرشىلىككە تارتىلدى.
سوت شەشىمىمەن ءۇش جۇرگىزۋشى كولىك قۇرالىن باسقارۋ قۇقىعىنان ايىرىلدى. قاتىسۋشىلاردىڭ ءبىرى بەس تاۋلىككە قاماققا الىندى. قالعاندارىنا اكىمشىلىك جازا قولدانىلدى. بەس كولىك ارنايى تۇراققا قويىلدى. بارلىق قاتىسۋشىعا مۇنداي ارەكەتتەردىڭ جول بەرىلمەيتىندىگى تۋرالى رەسمي ەسكەرتۋ جاسالدى.
«مەرەكەلىك شارا ەشكىمگە جول قوزعالىسىنىڭ باسقا قاتىسۋشىلارىن قاۋىپكە تىگۋگە قۇقىق بەرمەيدى. توي شەرۋلەرىنىڭ جولدا ەشقانداي ارتىقشىلىعى جوق. زاڭدى ورەسكەل جانە ادەيى بۇزعان ءاربىر كىنالى ءتيىستى جاۋاپكەرشىلىككە تارتىلادى»، — دەدى ءىىم وكىلدەرى.