قازاقستان پرەزيدەنتى قاسىم-جومارت توقايەۆ حالىق قاھارمانى يۆان گاپيچتىڭ قايتىس بولۋىنا بايلانىستى ونىڭ تۋعان-تۋىستارى مەن جاقىندارىنا كوڭىل ايتتى، دەپ حابارلايدى infohub.kz سايتى.
جەدەلحاتتا مەملەكەت باسشىسى يۆان گاپيچتىڭ مايدانعا ءوز ەركىمەن اتتانىپ، سوعىستى بايلانىسشى بولىپ وتكەنىن اتاپ ءوتتى. ورالعان سوڭ ول كوپ جىلدار بويى پروكۋراتۋرا ورگاندارىندا قىزمەت ەتتى.
«جوعارى ادامگەرشىلىك قاعيداتتارى بار، ءوز ءىسىنىڭ كاسىبي مامانى، ول ارىپتەستەرى مەن قوعام اراسىندا لايىقتى بەدەلگە يە بولدى. يۆان ستەپانوۆيچتىڭ ءومىر جولى — وتانشىلدىقتىڭ، بورىش پەن انتقا ادالدىقتىڭ، ادىلدىك مۇراتتارىنا بەرىكتىكتىڭ لايىقتى ۇلگىسى. يۆان ستەپانوۆيچ تۋرالى جارقىن ەسكە الۋ ءبىزدىڭ جۇرەگىمىزدە ماڭگى ساقتالادى»، — دەلىنگەن جەدەلحاتتا.
يۆان گاپيچ پولشانى، چەحوسلوۆاكيانى جانە ۋكراينانى ازات ەتۋگە قاتىستى. سوعىستان كەيىنگى جىلدارى قازاقستاننىڭ بىرنەشە وڭىرىندە پروكۋراتۋرا ورگاندارىندا قىزمەت ەتتى. 2023 جىلى وعان حالىق قاھارمانى اتاعى بەرىلدى.