قازاقستان پرەزيدەنتى قاسىم-جومارت توقايەۆ نەمىس ەكونوميكالىق قاۋىمداستىقتارى مەن قارجى ينستيتۋتتارىنىڭ باسشىلارىمەن كەزدەستى. كەزدەسۋ بارىسىندا ول Alatau Cityء-دى نەمىس قارجى سەكتورىنىڭ رەسپۋبليكا ەكونوميكاسىنا كەڭىنەن قاتىسۋى ءۇشىن «قاقپا» رەتىندە قاراستىرۋدى ۇسىندى، دەپ حابارلايدى infohub.kz سايتى.
مەملەكەت باسشىسى Alatau City — ورتالىق ازياداعى سيفرلىق ءداۋىردىڭ بارلىق تالاپتارىن ەسكەرە وتىرىپ جوبالانعان العاشقى «اقىلدى قالا» ەكەنىن ەسكە سالدى. ونىڭ ايتۋىنشا، جوبا نەمىس ينستيتۋسيونالدىق كاپيتالى مەن قازاقستاننىڭ ينۆەستيسيالىق مۇمكىندىكتەرىن بايلانىستىراتىن بۋىنعا اينالۋعا قابىلەتتى.
توقايەۆ Alatau City بۇكىل ەۋرازيادا تالانتتار، تەحنولوگيالار مەن بيزنەستىڭ جاڭا تارتىلىس ورتالىعىنا اينالاتىنىنا سەنىم ءبىلدىردى.
«پرەزيدەنت قازاقستان مەن گەرمانيانىڭ تىعىز قارجىلىق، تەحنولوگيالىق جانە ينۆەستيسيالىق سەرىكتەستىك قۇرۋ ءۇشىن بارلىق قاجەتتى مۇمكىندىكتەرگە يە ەكەنىن اتاپ ءوتتى. باستى ماقسات — بىرلەسىپ جاڭا سالالار مەن ۇزاق مەرزىمدى ءوسۋ نۇكتەلەرىن قۇرۋ»، — دەدى اقوردادا.
سونىمەن قاتار، قازاقستاندىق كوشباسشى ەل بولاشاقتا دا ينۆەستورلار ءۇشىن قولايلى ءارى بولجامدى جاعدايلاردى قامتاماسىز ەتىپ، ولاردىڭ قۇقىقتارىن قورعايتىنىن جانە ستراتەگيالىق ماڭىزدى جوبالاردى قولدايتىنىن ايتتى.
بۇعان دەيىن «كۋرسيۆ» توقاەۆتىڭ قازاقستان-گەرمانيا ينۆەستيسيالىق-قارجى پلاتفورماسىن قۇرۋدى ۇسىنعانىن جازعان بولاتىن. ول نەمىس جانە ەۋروپالىق كاپيتالدى قازاقستاندىق قارجىلاندىرۋمەن، كەپىلدىكتەرمەن جانە تاۋەكەلدەردى ءبولۋ تەتىكتەرىمەن بىرىكتىرۋى ءتيىس.