قازاقستان پرەزيدەنتى قاسىم-جومارت توقايەۆ قىزىلوردا – سەكسەۋىل، ۇلعايسىن – سەكسەۋىل جانە بەينەۋ – سەكسەۋىل اۆتوجولدارىنىڭ قۇرىلىسىنا ستارت بەردى، دەپ حابارلايدى infohub.kz سايتى.
مەملەكەت باسشىسى قازاقستان ەۋروپا مەن ازيانى جالعايتىن جەتەكشى لوگيستيكالىق توراپقا اينالۋى ءتيىس ەكەنىن اتاپ ءوتتى. جوبالاردى جۇزەگە اسىرۋعا وتاندىق كومپانيالاردى تارتۋ جوسپارلانۋدا، بۇل 10 مىڭنان استام ادامدى جۇمىسپەن قامتاماسىز ەتەدى. ماگيسترالدار ىسكە قوسىلعاننان كەيىن جۇك اعىنى 2،5 ەسە ارتىپ، جىلىنا 13،2 ميلليون تونناعا جەتەدى.
«باس ماقسات — ەلىمىزدى ەۋروپا مەن ازيانى جالعايتىن جەتەكشى لوگيستيكالىق توراپتاردىڭ بىرىنە اينالدىرۋ. قازاقستاندا اۆتوموبيل تاسىمالى تابىس دەڭگەيى جاعىنان تەمىرجول كولىگىمەن تەڭەستى»، — دەدى پرەزيدەنت.
توقايەۆ بارلىق جوبانى 2029 جىلعا دەيىن اياقتاۋ قاجەتتىگىن، بۇل ءۇشىن بارلىق قاجەتتى جاعداي جاسالعانىن مالىمدەدى. ول جالپى ۇزىندىعى 800 شاقىرىمدى قۇرايتىن بەينەۋ – سەكسەۋىل تراسساسىنىڭ ماڭىزدىلىعىن ەرەكشە اتاپ ءوتتى. ونىڭ پىكىرىنشە، بۇل جول نەگىزگى حالىقارالىق كولىك ارتەرياسىنا اينالۋى ءتيىس.
«جوبا جۇڭگو شەكاراسىنداعى باقىلاۋ-وتكىزۋ پۋنكتتەرىن اقتاۋ جانە قۇرىق پورتتارىمەن تىكەلەي بايلانىستىرادى. ناتيجەسىندە قىتايدان ەۋروپاعا جۇك تاسىمالى قاشىقتىعى 1 مىڭ شاقىرىمعا، ال جەتكىزۋ ۋاقىتى 3 كۇنگە دەيىن قىسقارادى»، — دەپ قوستى توقايەۆ.
قورىتىندىلاي كەلە، ول بۇل باعىتتى «ارال-كاسپي ماگيسترالى» دەپ اتاۋدى ۇسىندى.