قازاقستان پرەزيدەنتى قاسىم-جومارت توقايەۆ قورعانىس مينيسترلىگىن تۇبەگەيلى قايتا قۇرۋ قاجەتتىگىن مالىمدەدى. قاۋىپسىزدىك كەڭەسىنىڭ اپپاراتى ۆەدومستۆونىمەن بىرلەسىپ، ون كۇندىك مەرزىمدە اسكەري رەفورما جوسپارىن ۇسىنۋى ءتيىس، دەپ حابارلايدى infohub.kz سايتى.
«قاۋىپسىزدىك كەڭەسىنىڭ اپپاراتىمەن وتكەن جينالىستا اسكەري سالاداعى جۇمىستىڭ باسىم باعىتتارىن ايقىندادىم. ءبىزدىڭ ارميا وتكەن عاسىردا قاتىپ قالعان. سونىمەن قاتار، وزىق حالىقارالىق تاجىريبەگە سايكەس قولباسشىلىق جۇيەسىن تولىق قايتا قۇرۋ قاجەت. كەشەندى كوزقاراس كەرەك، ول ءۇشىن كورەگەندىك قاجەت، ال كورەگەندىك تەك كەڭ ءوي-ورىسى بار ساۋاتتى وفيسەرلەردە عانا بولادى. رەفورمانىڭ ماقساتى – جاڭا ۇلگىدەگى ارميا قالىپتاستىرۋ»، – دەپ اتاپ ءوتتى توقايەۆ.
مەملەكەت باسشىسى ارميانى سيفرلىق ترانسفورماسياعا كوشىرۋدى جانە مۇمكىن بولعان جەردە ادامنىڭ ورنىنا تەحنولوگيالاردى قولدانۋدى تاپسىردى.
«ارميانى دامىتۋعا جاڭا كوزقاراستار قاجەت. قالىپتى شەشىمدەر، «كورسەتىلىم» مانەۆرلەر، ادەمى ەسەپتەر ەشكىمگە كەرەك ەمەس»، – دەدى پرەزيدەنت.
قورعانىس ءمينيسترىنىڭ الدىنا قانداي مىندەتتەر قويىلدى
ءبىرىنشى مىندەت – بيۋدجەت قاراجاتىن پايدالانۋ تيىمدىلىگىن تۇبەگەيلى ارتتىرۋ.
«بولىنەتىن بارلىق قاراجات مەملەكەتتىڭ قورعانىس قابىلەتىن قامتاماسىز ەتۋگە بارىنشا ناتيجە بەرۋى ءتيىس. ماقساتسىز شىعىندار، اسىرەسە ۇرلىققا جول بەرىلمەيدى. مۇنداي ارەكەتتەر ءۇشىن جاۋاپكەرشىلىكتەن ەشكىم قۇتىلمايدى»، – دەدى توقايەۆ.
ەكىنشى مىندەت – قارۋلى كۇشتەردى زاماناۋي قاۋىپ-قاتەرلەردى ەسكەرە وتىرىپ رەفورمالاۋ. كادرلاردى باعالاۋ جانە ىرىكتەۋ ءۇشىن پرەزيدەنت اشىق كريتەريلەر ەنگىزۋدى ۇسىندى.
«قولباسشىلىق لاۋازىمدارعا جەكە ادالدىق ءپرينسيپى بويىنشا ەمەس، تەك تاجىريبە مەن قۇزىرەتتىلىك نەگىزىندە ۇسىنىلۋى كەرەك»، – دەدى ول.
ءۇشىنشى مىندەت – اسكەري قىزمەتشىلەر اراسىندا كونستيتۋسيا قۇندىلىقتارى، اسكەري ءىس تاريحى، قازاق جانە الەم مادەنيەتىنىڭ جەتىستىكتەرى نەگىزىندە يدەولوگيالىق جانە تاربيە جۇمىسىن كۇشەيتۋ. پرەزيدەنتتىڭ ايتۋىنشا، ارميا كاسىبي دايارلىق مەكتەبى جانە ءبىلىم مەن ءپاتريوتيزمنىڭ قاينار كوزى بولۋى ءتيىس، ال ءاربىر اسكەري قىزمەتشىنىڭ ءومىرى مەن قاۋىپسىزدىگى – ءسوزسىز باسىمدىق.
«وتاندى قورعاۋ – ءاربىر ازاماتتىڭ قاسيەتتى بورىشى. ءوز ءومىرىن اسكەري قىزمەتكە ارناعاندار مەملەكەتتىڭ قامقورلىعى مەن قولداۋىنا لايىق. ارميادا قىزمەت ەتۋ قورقىنىش پەن ۇرەي تۋعىزباۋى كەرەك، ارميا وتكەن مەن قازىرگىنىڭ ۇزدىك ۇلگىلەرىمەن جاس جاۋىنگەرلەردى، وتانىنىڭ شىنايى پاتريوتتارىن تاربيەلەيتىن ينستيتۋت بولۋعا ءتيىس»، – دەدى مەملەكەت باسشىسى.
توقايەۆ سونداي-اق اسكەري قىزمەتشىلەردىڭ، اسىرەسە قولباسشىلىقتىڭ جوعارى باعاسى مەن ماراپاتتاۋىنا يە بولعانداردىڭ قىزمەتىن وبەكتيۆتى جاريا ەتۋگە شاقىردى.
پرەزيدەنت كولەمدى تۇجىرىمدامالار مەن جول كارتالارىن ەمەس، ناقتى كەزەڭ-كەزەڭىمەن رەفورما جوسپارىن كۇتەتىنىن اتاپ ءوتتى. قۇجات قازان ايىنىڭ ەكىنشى جارتىسىندا قاۋىپسىزدىك كەڭەسىنىڭ وتىرىسىندا قارالادى. ارميانى رەفورمالاۋدى قاۋىپسىزدىك كەڭەسىنىڭ اپپاراتى ۇيلەستىرەدى.