ەكىباستۇزداعى «دكق القابى» ەكوجۇيەسىن قۇرۋعا G42 كومپانياسىنىڭ ىقتيمال قاتىسۋىن پرەزيدەنت قاسىم-جومارت توقايەۆ پەن بىرىككەن اراب امىرلىكتەرىنىڭ دەلەگاسياسى تالقىلادى. بۇل تۋرالى اقوردا حابارلادى. كەزدەسۋدە سونداي-اق بىرلەسكەن كولىك جانە سيفرلىق جوبالار قاراستىرىلدى، دەپ جازادى infohub.kz سايتى.
دەلەگاسيا قۇرامىندا ءباا ەنەرگەتيكا جانە ينفراقۇرىلىم ءمينيسترى سۋحەيل ال-مازرۋي، ابۋ-دابي امىرلىگىنىڭ دەنساۋلىق ساقتاۋ دەپارتامەنتىنىڭ ءتوراعاسى، G42 International كومپانياسىنىڭ باس ديرەكتورى مانسۋر ال-مانسۋري بولدى.
توقايەۆ قازاقستان مەن ءباا اراسىنداعى دوستىققا، ءوزارا سەنىمگە جانە ستراتەگيالىق سەرىكتەستىككە نەگىزدەلگەن قارىم-قاتىناستىڭ ەرەكشە سيپاتىن اتاپ ءوتتى. امىرلىكتەر قازاقستانعا ينۆەستيسيا سالاتىن ەڭ ءىرى ون شەتەلدىك ينۆەستوردىڭ قاتارىندا. 2025 جىلى باا-دەن تىكەلەي ينۆەستيسيا اعىنى $1،64 ملرد-قا جەتىپ، 3،5 ەسەگە ءوستى.
پرەزيدەنت ءباا پرەزيدەنتى شەيح مۇحاممەد بەن زايد ال ناحايانعا، ۆيسە-پرەزيدەنتكە، پرەمەر-مينيسترگە جانە دۋباي بيلەۋشىسى مۇحاممەد بەن راشيد ال ماكتۋمعا، سونداي-اق ءباا ۆيسە-پرەزيدەنتى جانە پرەمەر-مينيستردىڭ ورىنباسارى مانسۋر بەن زايد ال ناحايانعا سالەمىن جەتكىزدى.
كولىك-لوگيستيكا سالاسىندا تاراپتار AD Ports Group-پەن بىرلەسكەن جوبالاردى ىسكە اسىرۋدى، كاسپي تەڭىزىندەگى پورت ينفراقۇرىلىمى مەن فلوتتى دامىتۋدى، سونداي-اق ورتا ءدالىزدى نىعايتۋدى تالقىلادى.
بولەك ترانساۋعان ءدالىزىنىڭ پەرسپەكتيۆالارى مەن تەڭىز، تەمىرجول، اۆتوموبيل جانە اۋە تاسىمالدارىنداعى ۇزاق مەرزىمدى سەرىكتەستىك قاراستىرىلدى.
كەلىسسوزدەردىڭ تاعى ءبىر باعىتى جاساندى ينتەللەكت پەن سيفرلاندىرۋ بولدى. توقايەۆ Presight AI-مەن سۋپەركومپيۋتەرلىك ينفراقۇرىلىمدى دامىتۋ، Smart City جوبالارىن ىسكە اسىرۋ جانە كولىك قوزعالىسىن بەينەباقىلاۋدىڭ ۇلتتىق جۇيەسىن قۇرۋ سالاسىنداعى ىنتىماقتاستىقتى جوعارى باعالادى.
اڭگىمەلەسۋ بارىسىندا تاراپتار ەكىباستۇزداعى اۋقىمدى «دكق القابى» ەكوجۇيەسىن قۇرۋعا G42ء-نىڭ قاتىسۋ مۇمكىندىكتەرىن دە تالقىلادى.
بۇعان دەيىن «كۋرسيۆ» General Atlantic كومپانياسى ەكىباستۇزداعى «دكق القابى» جوباسىنا قاتىسۋعا ناقتى قىزىعۋشىلىق تانىتىپ وتىرعانىن جازعان. پرەزيدەنتپەن كەزدەسۋدە كومپانيا فينتەح، ەلەكتروندىق كوممەرسيا، باعدارلامالىق جاساقتاما، جاساندى ينتەللەكت، ەنەرگەتيكالىق جانە سيفرلىق ينفراقۇرىلىمعا ينۆەستيسيالاۋ مۇمكىندىكتەرىن دە ۇسىندى.
NVIDIA «دكق القابىنىڭ» كەلەسى كەزەڭىنە قاتىسۋدى جوسپارلاپ وتىر. جوبا قۋاتى شامامەن 300 مۆت ينفراقۇرىلىم قۇرۋدى، ونى 1 گۆت-قا دەيىن كەڭەيتۋ مۇمكىندىگىن كوزدەيدى. قازاقستاندا NVIDIA تەحنولوگيالارىنا نەگىزدەلگەن ەكى سۋپەركومپيۋتەرلىك كلاستەر ىسكە قوسىلدى.
سونداي-اق AI & Digital Bridge 2026 كورمەسىندە توقاەۆقا Qazaq AI Research University بازاسىنداعى AI-Enabled University مودەلى، Trusted Kazakhstan جانە ALFA جوبالارى، Aitu-دىڭ جاڭا فۋنكسيالارى مەن «سامۇرىق-قازىنا» مەن Higgsfield.ai-دىڭ ينتەللەكتۋالدى شەشىمدەرى تانىستىرىلدى.