قازاقستان پرەزيدەنتى قاسىم-جومارت توقايەۆ باۆاريا لاندتاگىنىڭ ءتوراعاسى يلزە ايگنەرمەن كەزدەستى. كەزدەسۋ بارىسىندا مەملەكەت باسشىسى بەرليندە گەرمانيانىڭ جوعارى باسشىلىعىمەن وتكەن كەلىسسوزدەردىڭ ءساتتى ءارى ناتيجەلى بولعانىن اتاپ ءوتتى، دەپ حابارلايدى infohub.kz سايتى.
قازاقستان پرەزيدەنتى باۆاريانىڭ قازاق-گەرمان قاتىناستارىن نىعايتۋعا قوسقان ۇلەسىنە جوعارى باعا بەردى.
«باۆاريا قازاقستانمەن ساۋدانى ىلگەرىلەتۋدە جانە بايلانىستاردى دامىتۋدا اسا ماڭىزدى ءرول اتقارادى. ءبىز ءۇشىن گەرمانيا — ەرەكشە سەرىكتەس. گەرمانيا قازاقستاننىڭ ەۋروپاداعى جانە ودان تىس جەرلەردەگى ستراتەگيالىق سەرىكتەسى دەپ سەنەمىز، ويتكەنى سىزدەردىڭ ىقپالدارىڭىز، رولدەرىڭىز بەن جەتىستىكتەرىڭىز ەۋروپانىڭ شەڭبەرىنەن الدەقايدا اسىپ تۇسەدى. سىزدەر الەمدەگى ءۇشىنشى ەكونوميكاسىزدار»، – دەدى قاسىم-جومارت توقايەۆ.
اڭگىمە بارىسىندا پارلامەنتارالىق ءوزارا ءىس-قيمىل ماسەلەلەرى، سونداي-اق مادەني-گۋمانيتارلىق بايلانىستاردى نىعايتۋ پەرسپەكتيۆالارى قوزعالدى.
يلزە ايگنەر مەملەكەت باسشىسىنا باۆاريا لاندتاگىنا ۋاقىت ءبولىپ كەلگەنى ءۇشىن العىس ايتىپ، ونىڭ ساپارىنىڭ باعدارلاماسىنىڭ تىعىزدىعىن ەرەكشە اتاپ ءوتتى.
لاندتاگ ءتوراعاسىنىڭ ايتۋىنشا، باۆاريادا قازاقستانمەن ساۋدا-ەكونوميكالىق، كولىكتىك جانە ينۆەستيسيالىق بايلانىستاردى نىعايتۋ مۇمكىندىكتەرى مۇقيات زەردەلەنۋدە.
كەزدەسۋ قورىتىندىسى بويىنشا قازاقستان مەن باۆاريا اراسىنداعى مازمۇندى ديالوگتى كەڭەيتۋگە ءوزارا مۇددەلىلىك راستالدى.