قازاقستان پرەزيدەنتى قاسىم-جومارت توقايەۆ بەرليندە گەرمانيانىڭ جەتەكشى جوعارى وقۋ ورىندارىنىڭ رەكتورلارىمەن كەزدەسۋىندە ەلىمىزدەگى عىلىمي زەرتتەۋلەردى قارجىلاندىرۋدى ءجىو-نىڭ 1%-ىنا دەيىن ۇلعايتۋ نيەتىن مالىمدەدى، دەپ حابارلايدى infohub.kz سايتى.
مەملەكەت باسشىسى جاساندى ينتەللەكت سالاسىنا ەرەكشە توقتالىپ، ونىڭ ەكىجاقتى ىنتىماقتاستىقتى ساپالى جاڭا دەڭگەيگە شىعارۋعا مۇمكىندىك بەرەتىنىن اتاپ ءوتتى.
توقايەۆ وسى سالاداعى قازاقستاننىڭ جەتىستىكتەرىن سانامالاپ بەردى: alem.cloud سۋپەركومپيۋتەرلىك كلاستەرىنىڭ ىسكە قوسىلۋى، AI-Sana جاساندى ينتەللەكتتى وقىتۋ باعدارلاماسى جانە بەيىندى زەرتتەۋ ۋنيۆەرسيتەتىنىڭ اشىلۋى. ول نەمىس كومپانيالارىنا قازاقستاندى يندۋستريا 4.0 تەحنولوگيالارىن سىناۋ الاڭى رەتىندە قاراستىرۋدى ۇسىندى.
«AI-Sana باعدارلاماسى اياسىندا 700 مىڭنان استام ستۋدەنت جاساندى ينتەللەكت سالاسىندا سەرتيفيكاتتالعان داعدىلارعا قول جەتكىزدى. ءبىز alem.cloud سۋپەركومپيۋتەرلىك كلاستەرىن ىسكە قوستىق، وسى سالادا مامانداندىرىلعان زەرتتەۋ ۋنيۆەرسيتەتىن اشتىق جانە وڭىردە العاشقىلاردىڭ ءبىرى بولىپ جاساندى ينتەللەكت تۋرالى زاڭ قابىلدادىق. بۇل كۇش-جىگەردىڭ بارلىعى وزىق سۋپەركومپيۋتەرلىك تەحنولوگيالارمەن تولىقتىرىلۋدا. بۇل نەمىس عىلىمي مەكەمەلەرىمەن جانە ونەركاسىبىمەن ىنتىماقتاستىق ءۇشىن جاڭا مۇمكىندىكتەر تۋعىزادى. تەحنولوگياعا بەيىم جاس بۋىنىمىز نەمىس كومپانيالارى مەن زەرتتەۋشىلەرى ءۇشىن سەنىمدى سەرىكتەس بولا الادى. قازاقستان ءوز كەزەگىندە قولدانبالى سيفرلىق شەشىمدەر مەن يندۋستريا 4.0 تەحنولوگيالارىن سىناقتان وتكىزۋ الاڭىن ۇسىنا الادى»، – دەپ اتاپ كورسەتتى ول.
پرەزيدەنت قازاق جانە نەمىس زياتكەرلىك داستۇرلەرىنىڭ تاريحي بايلانىسىن بولەك اتاپ، ۇلى قازاق اقىنى ءارى ويشىلى اباي قۇنانباي ۇلىنىڭ يوگانن ۆولفگانگ فون گوتەنىڭ «قاڭعىباس ءانشىنىڭ تۇنگى ءانى» ولەڭىن قازاق تىلىنە اۋدارعانىن ەسكە سالدى. ونىڭ ايتۋىنشا، بۇل اۋدارما ەكى حالىق اراسىنداعى العاشقى زياتكەرلىك كوپىرلەردىڭ ءبىرى بولعان.
سوڭىندا مەملەكەت باسشىسى گەرمانيا مەن قازاقستاننىڭ جەتەكشى ۋنيۆەرسيتەتتەرى مەن عىلىمي ينستيتۋتتارىنىڭ باسشىلارىن جاڭا جوبالاردى جۇزەگە اسىرۋ ءۇشىن ەكى ەلدىڭ الەۋەتىن بىرىكتىرۋگە شاقىردى.
بۇعان دەيىن «كۋرسيۆ» توقاەۆتىڭ گەرمانيامەن ءبىلىم الماسۋ باعدارلاماسىن قولداعانىن جازعان بولاتىن.
سونداي-اق قازاقستان باسشىسى سەرىكتەستىكتى تەرەڭدەتۋدىڭ ءۇش نەگىزگى باعىتىن اتادى:
اكادەميالىق الماسۋ جانە ديپلومدار: بىرلەسكەن ءبىلىم بەرۋ باعدارلامالارى مەن قوس ديپلوم باعدارلامالارىن كەڭەيتۋ، سونداي-اق ستۋدەنتتەر مەن زەرتتەۋشىلەردىڭ بىرلەسكەن جۇمىسىنا جاعداي جاساۋ.
عىلىم مەن يندۋستريانىڭ بايلانىسى: شيكىزاتتىق مودەلدەن جوعارى تەحنولوگيالارعا كوشۋ. مىسال رەتىندە شقتۋ، وسكەمەن مەتاللۋرگيا زاۋىتى جانە فرايبەرگ تاۋ اكادەمياسىنىڭ قاتىسۋىمەن TiBeRIUM جوباسى (تيتان مەن بەريللي ءۇشىن تومەن كومىرتەكتى تىزبەكتەردى ازىرلەۋ) كەلتىرىلەدى.
تەحنولوگيالار ترانسفەرى: توقايەۆ نەمىس بيزنەسىن بىرلەسكەن مەكەمەلەر جانىنان ينجەنەرلىك زەرتحانالار مەن تەحنولوگيالار ترانسفەرى ورتالىقتارىن اشۋعا شاقىرىپ، مەملەكەتتىك قوسا قارجىلاندىرۋعا ۋادە بەردى.