قازاقستان پرەزيدەنتى قاسىم-جومارت توقايەۆ بريكس ءسامميتى اياسىندا اقش پرەزيدەنتىنىڭ وڭتۇستىك جانە ورتالىق ازيا جونىندەگى ارنايى وكىلى سەردجيو گورمەن كەزدەستى. اڭگىمە باسىندا امەريكاندىق وكىل مەملەكەت باسشىسىنا قازاقستان تاۋەلسىزدىگىنىڭ 35 جىلدىعى قارساڭىندا اقش پرەزيدەنتى دونالد ترامپتىڭ جەكە قۇتتىقتاۋ حاتىن تاپسىردى، دەپ حابارلايدى infohub.kz سايتى.
قاسىم-جومارت توقايەۆ اقش پرەزيدەنتىنە جىلى لەبىزى ءۇشىن العىس ايتىپ، امەريكاندىق كوشباسشىنى قازاقستانعا رەسمي ساپارمەن كەلۋگە شاقىردى.
مەملەكەت باسشىسى كەڭەيتىلگەن قازاق-امەريكاندىق ستراتەگيالىق ارىپتەستىكتىڭ قارقىندى دامىپ كەلە جاتقانىن اتاپ ءوتىپ، ءوزارا ءىس-قيمىلدى ودان ءارى نىعايتۋدىڭ ەرەكشە ماڭىزدىلىعىن اتاپ كورسەتتى.
«ءقازىر ماياميدەگى G20 سامميتىنە قاتىسۋعا دايىندالىپ جاتىرمىن. بۇل ەكىجاقتى كۇن تارتىبىندەگى ماسەلەلەردى تالقىلاۋعا دا تاماشا مۇمكىندىك بولادى دەپ ويلايمىن. ءبىز ءوزارا ىنتىماقتاستىعىمىزدى ىلگەرىلەتۋ ءۇشىن ادەمى سوزدەردى ەمەس، ناقتى ىستەر مەن پراكتيكالىق قادامداردى قالايمىز»، – دەدى قازاقستان پرەزيدەنتى.
سەردجيو گور ءوز كەزەگىندە قازاقستان مەن اقش كوشباسشىلارى اراسىنداعى تىعىز جانە سەنىمدى بايلانىستاردىڭ ارقاسىندا ەكىجاقتى قاتىناستار بۇرىن-سوڭدى بولماعان جوعارى دەڭگەيگە جەتكەنىن اتاپ ءوتتى.
«بۇگىندە ەلدەرىمىز اراسىنداعى ساۋدا-ەكونوميكالىق بايلانىستار مەن ءوزارا ءىس-قيمىل بەلسەندى دامىپ كەلەدى. ءبىزدىڭ پرەزيدەنتىمىز قازاقستانمەن جانە ورتالىق ازيامەن ارىپتەستىكتى نىعايتۋعا ۇلكەن كوڭىل بولەدى»، – دەدى ارنايى وكىل.
كەزدەسۋ بارىسىندا جاساندى ينتەللەكت پەن سيفرلاندىرۋ سياقتى باسىم سالالارعا باسا نازار اۋدارا وتىرىپ، بىرلەسكەن جۇمىستىڭ ءبىرقاتار ماڭىزدى باعىتتارى دا قاراستىرىلدى.
سوڭىندا اڭگىمەلەسۋشىلەر كوپقىرلى ارىپتەستىكتى ودان ءارى كەڭەيتۋگە جانە ءوزارا ءتيىمدى ىنتىماقتاستىققا قوسىمشا سەرپىن بەرۋگە ۇمتىلاتىندارىن راستادى.
بۇعان دەيىن «كۋرسيۆ» توقاەۆتىڭ XVIII بريكس ءسامميتى اياسىندا ابۋ-دابي مۇراگەر حانزاداسى شەيح حالەد بەن مۇحاممەد بەن زايد ال-ناحايانمەن كەزدەسكەنىن جازعان بولاتىن.