2025 جىلى زورلىق-زومبىلىقتان الەم ەكونوميكاسىنا كەلگەن شىعىن شامامەن 22 تريلليون دوللاردى قۇرادى. بۇل — جاھاندىق ءجىو-نىڭ 10 پايىزى. وسىنداي باعانى قازاقستان پرەزيدەنتى قاسىم-جومارت توقايەۆ نيۋ-دەليدە وتكەن «بريكس پليۋس» ءسامميتىنىڭ پلەنارلىق وتىرىسىندا ايتتى، دەپ حابارلايدى اقوردا، infohub.kz سايتىنا سىلتەمە جاساپ.
«اۋتريچ» / «بريكس پليۋس» فورماتىنداعى وتىرىس تۇراقتىلىقتى نىعايتۋعا، يننوۆاسيالارعا، ىنتىماقتاستىققا جانە تۇراقتىلىققا ارنالدى. مەملەكەت باسشىسى ءۇندىستان پرەمەر-مينيسترى نارەندرا موديگە قوناقجايلىعى مەن كەزدەسۋدى ۇيىمداستىرعانى ءۇشىن العىس ايتتى.
«ءبىزدىڭ كەزدەسۋىمىز ءۇندىستاننىڭ بىرەگەي باي مادەني مۇراسىن بەينەلەيتىن نيۋ-دەليدە ءوتىپ جاتقانى سيمۆولدىق مانگە يە. بريكس اياسىنداعى ىنتىماقتاستىقتىڭ 20 جىلدىعى قارساڭىندا ءۇندىستاننىڭ ءتوراعالىعى حالىق مۇددەسىنە باعىتتالعان جانە „ادامزات بارىنەن بيىك“ قاعيداتىنا نەگىزدەلگەن وزەكتى كۇن تارتىبىنە ەرەكشە سەرپىن بەردى»، — دەدى قازاقستان پرەزيدەنتى.
ونىڭ ايتۋىنشا، بريكس ەلدەرى پلانەتا حالقىنىڭ جارتىسىنا جۋىعىن قۇرايدى جانە الەمدىك ءجىو-نىڭ 40 پايىزىن قامتاماسىز ەتەدى. بۇل بىرلەستىككە زور مۇمكىندىكتەر بەرىپ وتىر، سونىمەن قاتار الشاقتىقتى ەڭسەرۋ جانە ناقتى ناتيجەلەرگە قول جەتكىزۋ ءۇشىن وعان جاۋاپكەرشىلىك جۇكتەيدى.
توقايەۆ بۇل الەۋەتتى تولىق ىسكە اسىرۋ الەمدىك قوعامداستىقتىڭ ىرگەلى ماسەلەلەرىن شەشپەي جانە جەتەكشى دەرجاۆالار اراسىنداعى سەنىمدى قالپىنا كەلتىرمەي مۇمكىن ەمەس ەكەنىن اتاپ ءوتتى.
پرەزيدەنت 2026 جىلعى جاھاندىق بەيبىتشىلىك يندەكسىنە سىلتەمە جاسادى. ونىڭ اۆتورلارى « ۇلى فراگمەنتاسيا» ۇعىمىن قولدانادى. ول گەوساياسي قاقتىعىس، ميليتاريزاسيانىڭ كۇشەيۋى، كوپجاقتى ينستيتۋتتاردىڭ السىرەۋى جانە ساۋدا كەدەرگىلەرىنىڭ ءوسۋى كەزەڭىن سيپاتتايدى.
«ايماقتىق قاقتىعىستار تىكەلەي قارسىلاسۋ ايماقتارىنان الدەقايدا اسىپ، الەم ەكونوميكاسىنا ەلەۋلى اسەر ەتىپ جاتقانىن كورىپ وتىرمىز. ماڭىزدى تەڭىز مارشرۋتتارىنىڭ بۇزىلۋى جاھاندىق ەنەرگەتيكالىق، ازىق-ت ۇلىك جانە ساۋدا تىزبەكتەرىنىڭ وسالدىعىن انىقتادى»، — دەدى توقايەۆ.