قازاقستان پرەزيدەنتى قاسىم-جومارت توقايەۆ گەرمانياعا ساپارى بارىسىندا نەمىس تەمىرجول كونسەرنى Deutsche Bahn (DB) باسشىلىعىمەن كەلىسسوز جۇرگىزدى. كەزدەسۋدە قازاقستان تەمىر جولىن جاڭعىرتۋ، وتاندىق ءونىمدى گەرمانيا فەدەراتيۆتىك رەسپۋبليكاسىنا جەتكىزۋ جانە ورتا ءدالىزدى (ترانسكاسپي حالىقارالىق كولىك باعىتى، تحكب) كەڭەيتۋ ماسەلەلەرى باستى نازاردا بولدى، دەپ حابارلايدى infohub.kz سايتى.
مەملەكەت باسشىسى Deutsche Bahn كومپانياسىنىڭ رەسپۋبليكانىڭ كولىك سالاسىن ترانسفورماسيالاۋعا قوسقان ۇلەسىنە جوعارى باعا بەردى. اتاپ ايتقاندا، DB Engineering & Consulting پەن «قتج» ۇك» اق-نىڭ قازاقستانداعى جولاۋشىلار تاسىمالىنىڭ ساپاسى مەن تيىمدىلىگىن ارتتىرۋعا باعىتتالعان بىرلەسكەن جوباسى تۋرالى ءسوز بولدى.
سونىمەن قاتار پرەزيدەنت قازاقستاندىق وندىرۋشىلەردىڭ نەمىس الىبىنىڭ جاھاندىق جەتكىزۋ تىزبەگىنە كىرىگۋىنىڭ ماڭىزدىلىعىن اتاپ ءوتتى. ول ءۇشىن وتاندىق كاسىپورىندار گەرمانيا فەدەراتيۆتىك رەسپۋبليكاسىنىڭ ستاندارتتارى بويىنشا ءتيىستى سەرتيفيكاتتاۋدان ءوتۋى قاجەت.
Deutsche Bahn AG ساتىپ الۋ جونىندەگى ديرەكتورى يان گروتە قاسىم-جومارت توقاەۆقا كومپانيانىڭ قازاقستانداعى جۇمىسىنا بەرگەن جوعارى باعاسى ءۇشىن العىس ايتىپ، سەرىكتەستىكتى كەڭەيتۋگە دايىن ەكەنىن راستادى.
كەزدەسۋدە DB Cargo Eurasia GmbH باسشىسى اندرەاس ليۋبستىڭ قاتىسۋىمەن جۇك باعىتىنا جەكە كوڭىل ءبولىندى. قازاقستان مەن DB Cargo Eurasia كونتەينەرلىك تاسىمال كولەمىن ودان ءارى ۇلعايتا بەرەدى، بۇل رەتتە ازيا مەن ەۋروپانى جالعايتىن باستى بۋىنعا اينالعان ترانسكاسپي حالىقارالىق كولىك باعىتىنا (تحكب / ورتا ءدالىز) باستى نازار اۋدارىلادى.
كەلىسسوز سوڭىندا تاراپتار لوگيستيكالىق كەشەننىڭ بارلىق سپەكترى بويىنشا ۇزاق مەرزىمدى جانە جۇيەلى ىنتىماقتاستىقتى دامىتۋ نيەتىن راستادى.