قازاقستان پرەزيدەنتى قاسىم-جومارت توقاەۆتىڭ گەرمانياعا رەسمي ساپارى ەلدىڭ ەكونوميكالىق قاۋىمداستىقتارى مەن قارجى ينستيتۋتتارىنىڭ باسشىلارىمەن كەزدەسۋدەن باستالدى، دەپ حابارلايدى infohub.kz سايتى.
پرەزيدەنتتىڭ ءباسپاسوز قىزمەتى مالىمدەگەندەي، قاسىم-جومارت توقايەۆ كەزدەسۋگە قاتىسۋشىلارمەن گەرماندىق قارجىنى، ساراپتامالىق تاجىريبەنى جانە تاۋەكەلدەردى باسقارۋ قۇرالدارىن قازاقستاننىڭ رەسۋرستارى مەن كولىك الەۋەتىمەن بىرىكتىرۋ پەرسپەكتيۆالارىن تالقىلادى.
مەملەكەت باسشىسى ەلىمىزدىڭ گەرمانيانىڭ ورتالىق ازياداعى جانە ەۋرازيا كەڭىستىگىندەگى سەنىمدى سەرىكتەسى بولۋعا ۇمتىلاتىنىن مالىمدەدى.
«گەرمانيا مەنىڭ حالقىمنىڭ تەرەڭ قۇرمەتىنە بولەنگەنىن جانە قازاقستاندا وتە جوعارى بەدەلگە يە ەكەنىن اتاپ وتكىم كەلەدى. سىزدەردىڭ بانك سەكتورىڭىزدىڭ ءتارتىبى، ينجەنەرلىك شەشىمدەردىڭ جوعارى ساپاسى، سونداي-اق شاعىن جانە ورتا بيزنەستىڭ (Mittelstand) تۇراقتىلىعى — ءبىز جاڭعىرتۋ مەن تەحنولوگيالىق ترانسفورماسيا بارىسىندا ەكونوميكامىزعا ەنگىزۋگە ۇمتىلاتىن ءدال سول قاسيەتتەر. گەرمانيا فەدەراتيۆتىك رەسپۋبليكاسى — ەۋروپاداعى نەگىزگى سەرىكتەستەرىمىزدىڭ ءبىرى. قازاق-گەرمان ىنتىماقتاستىعى قازاقستاننىڭ ەڭ ءىرى ساۋدا جانە ينۆەستيسيالىق سەرىكتەسى — ەۋروپالىق وداقپەن ءوزارا ءىس-قيمىلىنىڭ اجىراماس بولىگى. ءبىز بىرگە ۇلكەن جولدان وتتىك، ءبىراق ەكونوميكالىق سەرىكتەستىگىمىزدىڭ الەۋەتى ءالى دە تولىق پايدالانىلعان جوق. قازاقستان ونى ساپالى جاڭا دەڭگەيگە شىعارۋعا دايىن»، — دەدى پرەزيدەنت.
وسىلايشا، قاسىم-جومارت توقايەۆ قازاقستان-گەرمان ينۆەستيسيالىق-قارجى پلاتفورماسىن قۇرۋدى ۇسىندى.
«مۇنداي پلاتفورما گەرماندىق جانە ەۋروپالىق كاپيتالدى قازاقستاندىق قارجىلاندىرۋمەن، كەپىلدىكتەرمەن جانە تاۋەكەلدەردى ءبولۋ تەتىكتەرىمەن بىرىكتىرۋگە مۇمكىندىك بەرەدى، ال «بايتەرەك» حولدينگى جوبالاردى قۇرىلىمداۋدى قامتاماسىز ەتەدى. ءبىز ەلىمىزدە جۇمىس ىستەپ جاتقان حالىقارالىق قارجى ۇيىمدارىمەن قاتار گەرماندىق ەكسپورتتىق كرەديتتەۋ جانە ينۆەستيسيالاردى ساقتاندىرۋ ينستيتۋتتارىنىڭ قاتىسۋىن قۇپتايمىز. وسى تۇرعىدا قازاقستاندا قىزمەتىن جۇزەگە اسىرىپ جاتقان Euler Hermes كومپانياسىمەن ىنتىماقتاستىققا بەرەتىن ماڭىزىمىزدى ەرەكشە اتاپ وتكەن ءجون»، — دەپ ءتۇسىندىردى قازاقستان پرەزيدەنتى.
سوزىندە تاعى ءبىر باسىمدىق رەتىندە سيفرلىق يننوۆاسيالار مەن جاساندى ينتەللەكت سالاسىنداعى قازاق-گەرمان سەرىكتەستىگىن قۇرۋ اتالدى.
«ءبىز گەرماندىق كومپانيالاردى دەرەكتەردى وڭدەۋ ورتالىقتارىنا ارنالعان تەحنولوگيالار، ەنەرگيا تيىمدىلىگى، بۇلتتىق ينفراقۇرىلىم جانە كيبەرقاۋىپسىزدىك سياقتى سالالاردا ءوز الەۋەتىن پايدالانۋعا شاقىرامىز. تاعى ءبىر پەرسپەكتيۆالى باعىت — فينتەح. قازاقستاننىڭ سيفرلىق قارجى ەكوجۇيەسىنىڭ جوعارى دامۋ دەڭگەيى ىشكى نارىقتا وزىق تولەم شەشىمدەرى مەن توكەنيزاسيا تەحنولوگيالارىن قۇرۋعا، كەيىننەن ولاردى بۇكىل ايماققا كەڭەيتۋگە مۇمكىندىك بەرەدى»، — دەدى مەملەكەت باسشىسى.
قاسىم-جومارت توقاەۆتىڭ پىكىرىنشە، ىنتىماقتاستىقتىڭ كەلەسى باعىتى — نەمىس قارجى سەكتورىنىڭ قازاقستان ەكونوميكاسىنا كەڭىرەك قاتىسۋى ءۇشىن «قاقپا» بولۋعا ءتيىس Alatau City دامىتۋ.
«بۇل جوبا — ورتالىق ازياداعى سيفرلىق ءداۋىردىڭ بارلىق تالاپتارىن ەسكەرە وتىرىپ جوبالانعان العاشقى «اقىلدى قالا». ول نەمىس ينستيتۋسيونالدىق كاپيتالى مەن قازاقستاننىڭ ينۆەستيسيالىق مۇمكىندىكتەرى اراسىنداعى پراكتيكالىق بايلانىستىرۋشى بۋىنعا اينالا الادى. Alatau City بۇكىل ەۋرازيادا تالانتتار، تەحنولوگيالار مەن بيزنەستىڭ جاڭا تارتىلىس ورتالىعىنا اينالاتىنىنا سەنىمدىمىن»، — دەپ ەسەپتەيدى پرەزيدەنت.
قورىتىندىلاي كەلە، قاسىم-جومارت توقايەۆ قازاقستان مەن گەرمانيا ساياسي ديالوگتىڭ جوعارى دەڭگەيىنە سۇيەنە وتىرىپ، تىعىز قارجىلىق، تەحنولوگيالىق جانە ينۆەستيسيالىق سەرىكتەستىك قۇرۋ ءۇشىن بارلىق قاجەتتى مۇمكىندىكتەرگە يە ەكەنىن اتاپ ءوتتى. باستى ماقسات — كاپيتال اعىنىن جاي عانا ۇلعايتۋ ەمەس، بىرلەسىپ جاڭا سالالار مەن ۇزاق مەرزىمدى ءوسۋ نۇكتەلەرىن قۇرۋ.