قازاقستان پرەزيدەنتى قاسىم-جومارت توقايەۆ پەن گەرمانيا فەدەرالدىق پرەزيدەنتى فرانك-ۆالتەر شتاينمايەر كەڭەيتىلگەن قۇرامدا كەلىسسوز جۇرگىزدى. مەملەكەت باسشىسى نەمىس ارىپتەسىنە گەرمانياعا شاقىرعانى ءۇشىن العىس ايتىپ، جوعارى دەڭگەيدەگى بايلانىستاردىڭ قارقىندىلىعى ەكىجاقتى ىنتىماقتاستىقتىڭ ستراتەگيالىق ءارى جان-جاقتى سيپاتىن كورسەتەتىنىن اتاپ ءوتتى، دەپ حابارلايدى infohub.kz سايتى.
قازاقستان پرەزيدەنتىنىڭ ايتۋىنشا، گەرمانيا — رەسپۋبليكانىڭ ەۋروپاداعى نەگىزگى سەرىكتەسى. ەكى ەلدى بەرىك دوستىق پەن ءوزارا سەنىم بايلانىستارى، سونداي-اق پراكتيكالىق ىنتىماقتاستىقتى دامىتۋدىڭ زور الەۋەتى بىرىكتىرەدى.
«بۇگىندە قارىم-قاتىناسىمىز ورلەۋ ۇستىندە سەنىمدى دامىپ، بارعان سايىن كەڭ اۋقىمدى قامتيدى. بۇل وڭ ديناميكاعا جوعارى دەڭگەيدەگى بەلسەندى ساياسي ديالوگ ىقپال ەتۋدە، ونى ەكى ەل ۇكىمەتتەرىنىڭ جۇيەلى ءوزارا ءىس-قيمىلى مەن ىسكەر توپتاردىڭ بايلانىستارى نىعايتىپ وتىر. مەنىڭ ساپارىم قارساڭىندا بەرليندە وتكەن ۇكىمەتارالىق جۇمىس توبى مەن قازاقستان-گەرمانيا ستراتەگيالىق ىنتىماقتاستىق ىسكەرلىك كەڭەسىنىڭ وتىرىستارى ءوزارا ءتيىمدى سەرىكتەستىكتى ودان ءارى كەڭەيتۋگە دەگەن ورتاق ۇمتىلىستى راستادى»، — دەدى قاسىم-جومارت توقايەۆ.
مەملەكەت باسشىسى ساۋدا-ەكونوميكالىق جانە ينۆەستيسيالىق ىنتىماقتاستىقتىڭ قارقىندى دامىپ كەلە جاتقانىن ەرەكشە اتاپ ءوتتى.
«2025 جىلى ەكىجاقتى تاۋار اينالىمى 4،5 ملرد دوللارعا جەتتى. بيىل دا وڭ ديناميكا ساقتالۋدا. اعىمداعى جىلدىڭ جەتى ايىندا ءوزارا ساۋدا كولەمى 2،6 ملرد دوللاردان استى. قازاقستاندا بۇگىندە نەمىس كاپيتالى قاتىساتىن 1400-دەن استام كومپانيا تىركەلگەن. 20 جىلدا گەرمانيادان كەلگەن ينۆەستيسيانىڭ جالپى اعىنى 8 ملرد دوللاردى قۇرادى. ءوزارا ءىس-قيمىلىمىزدىڭ جارقىن مىسالى رەتىندە CLAAS Group، Rhenus Logistics، Siemens Energy، Linde سياقتى جەتەكشى گەرمان كومپانيالارىمەن ىنتىماقتاستىقتى اتاۋعا بولادى»، — دەپ اتاپ ءوتتى قازاقستان پرەزيدەنتى.
كەلىسسوز بارىسىندا ەكى ەل اراسىنداعى مادەني-گۋمانيتارلىق ىنتىماقتاستىقتى نىعايتۋ ماسەلەلەرىنە جەكە نازار اۋدارىلدى. اتاپ ايتقاندا، مەملەكەت باسشىلارى جوعارى ءبىلىم، مەديسينا جانە مادەنيەت سالالارىنداعى ءوزارا ءىس-قيمىلدى كەڭەيتۋگە بەيىلدى ەكەندىكتەرىن راستادى.