قازاقستان پرەزيدەنتى قاسىم-جومارت توقايەۆ رەسمي ساپارمەن بەرلينگە كەلىپ، گەرمانيا فەدەرالدىق پرەزيدەنتى فرانك-ۆالتەر شتاينمايەرمەن تار شەڭبەردە كەلىسسوز جۇرگىزدى، دەپ حابارلايدى infohub.kz سايتى.
مەملەكەت باسشىسىن قارسى الۋ ءراسىمى گەرمانيا قورعانىس مينيسترلىگىندە ءوتتى. پرەزيدەنتتەر بىر-بىرىنە دەلەگاسيا مۇشەلەرىن تانىستىردى، سودان كەيىن قۇرمەت قاراۋىلى روتاسىنىڭ كومانديرى سالەمدەسۋ بايانىن وقىپ، ەكى ەلدىڭ مەملەكەتتىك ءانۇراندارى شىرقالدى.
كەيىن توقايەۆ پەن شتاينمايەر گەرمانيا فەدەرالدىق پرەزيدەنتىنىڭ رەزيدەنسياسىنا بەت الدى. قازاقستان پرەزيدەنتى قۇرمەتتى قوناقتار كىتابىنا جازبا قالدىردى.
كەلىسسوز بارىسىندا توقايەۆ شتاينمايەرگە شاقىرتۋى مەن قابىلداۋى ءۇشىن العىس ايتتى. ول گەرمانيانى قازاقستاننىڭ ەۋروپاداعى نەگىزگى ستراتەگيالىق سەرىكتەسى دەپ اتاپ، ەكى ەل اراسىنداعى ىنتىماقتاستىق ءوزارا سەنىمگە، قۇرمەتكە جانە ورتاق مۇددەلەرگە نەگىزدەلگەنىن اتاپ ءوتتى.
مەملەكەت باسشىسى سونداي-اق 2027 جىلى قازاقستان مەن گەرمانيا اراسىندا ديپلوماتيالىق قاتىناستار ورناعانىنا 35 جىل تولاتىنىن ەسكە سالدى.
شتاينمايەر ءوز كەزەگىندە توقاەۆتىڭ استانا مەن بەرلين اراسىنداعى ىنتىماقتاستىقتى دامىتۋعا قوسقان ۇلەسىن اتاپ ءوتتى. گەرمانيا پرەزيدەنتى رەسمي ساپار ەكىجاقتى قاتىناستارعا قوسىمشا سەرپىن بەرەتىنىنە سەنىم ءبىلدىردى.
بۇعان دەيىن «كۋرسيۆ» گەرمانياعا ساپارى بارىسىندا توقايەۆ ەۋروپالىق كاپيتالدى قازاقستاندىق قوسا قارجىلاندىرۋمەن، كەپىلدىكتەرمەن جانە تاۋەكەلدەردى ءبولۋ تەتىكتەرىمەن بىرىكتىرەتىن قازاقستان-گەرمانيا ينۆەستيسيالىق-قارجى پلاتفورماسىن قۇرۋدى ۇسىنعانىن جازعان. بىرنەشە جىل ىشىندە قازاقستاننىڭ دامۋ بانكى ونەركاسىپ، ەنەرگەتيكا جانە كولىك ينفراقۇرىلىمى سالالارىنداعى جوبالار ءۇشىن نەمىس قارجى ۇيىمدارىنان 1،2 ملرد دوللاردان استام قاراجات تارتتى. پرەزيدەنت ودان ءارى ىنتىماقتاستىقتىڭ باسىم باعىتتارى رەتىندە اسا ماڭىزدى ماتەريالداردى، جاڭارتىلاتىن ەنەرگەتيكانى جانە «جاسىل» سۋتەگىن اتادى.