قازاقستان پرەزيدەنتى قاسىم-جومارت توقايەۆ ەلدىڭ كۇش قۇرىلىمدارىندا كادرلىق وزگەرىستەر جاسادى. مەملەكەت باسشىسىنىڭ ءتيىستى وكىمدەرىن اقوردا جاريالادى، دەپ حابارلايدى infohub.kz سايتى.
پرەزيدەنت وكىمىمەن ايتقۇرمان وماربەكوۆ قازاقستان رەسپۋبليكاسى قورعانىس ءمينيسترىنىڭ ءبىرىنشى ورىنباسارى — قارۋلى كۇشتەرىنىڭ باس شتابىنىڭ باستىعى بولىپ تاعايىندالدى. بۇعان قوسا، ول بۇرىنعى قىزمەتىنەن بوساتىلدى.
سونىمەن قاتار، مەملەكەت باسشىسىنىڭ جارلىعىمەن ازامات حاسەنوۆ ق ر مەملەكەتتىك كۇزەت قىزمەتى باستىعىنىڭ ورىنباسارى — ەرەكشە ماقساتتاعى كۇشتەردىڭ قولباسشىسى بولىپ تاعايىندالدى.
ايتقۇرمان وماربەكوۆ 1977 جىلى اباي وبلىسىندا دۇنيەگە كەلگەن. ول رەسەي فەدەراسياسى قورعانىس مينيسترلىگىنىڭ اسكەري ۋنيۆەرسيتەتىن «مورالدىق-پسيحولوگيالىق قامتاماسىز ەتۋدى ۇيىمداستىرۋ» ماماندىعى بويىنشا، سونداي-اق ەۋرازيالىق گۋمانيتارلىق ينستيتۋتتى «قۇقىقتانۋ» ماماندىعى بويىنشا بىتىرگەن.
1997–2022 جىلدارى وماربەكوۆ رەسپۋبليكالىق گۆارديادا، سونداي-اق قازاقستان رەسپۋبليكاسى مەملەكەتتىك كۇزەت قىزمەتىندە ءتۇرلى وفيسەرلىك جانە باسشىلىق لاۋازىمداردا قىزمەت ەتتى.
2022 جىلدىڭ اقپانىندا ول قازاقستان رەسپۋبليكاسى مەملەكەتتىك كۇزەت قىزمەتى باستىعىنىڭ ورىنباسارى — ەرەكشە ماقساتتاعى كۇشتەردىڭ قولباسشىسى بولىپ تاعايىندالعان بولاتىن.
ازامات حاسەنوۆ تۋرالى مالىمەت از. 2025 جىلى ول ق ر مەملەكەتتىك كۇزەت قىزمەتى ەرەكشە ماقساتتاعى كۇشتەرى قولباسشىسىنىڭ ورىنباسارى، جەدەل باسقارما شتابىنىڭ باستىعى قىزمەتىن اتقارعان. پولكوۆنيك شەنى بار.
بۇعان دەيىن «كۋرسيۆ» پرەزيدەنتتىڭ قارۋلى كۇشتەر باس شتابىنىڭ باستىعىن، قورعانىس ءمينيسترىنىڭ ورىنباسارىن جانە اسكەري-تەڭىز كۇشتەرىنىڭ باس قولباسشىسىن قىزمەتتەرىنەن بوساتقانىن جازعان. لاۋازىمدارىنان قانىش ابۋباكىروۆ، الماز جۇماكەيەۆ جانە قانات نيازبەكوۆ ايىرىلدى.