Alatau City-دە كورەيانىڭ وزىق تەحنولوگيالار ۋنيۆەرسيتەتىنىڭ (KAIST) فيليالى اشىلادى. قازاقستان پرەزيدەنتى قاسىم-جومارت توقايەۆ بۇل جوبانى رەسپۋبليكانىڭ وڭتۇستىك كورەيامەن سيفرلاندىرۋ جانە جاساندى ينتەللەكت سالاسىنداعى ىنتىماقتاستىعى ءۇشىن سەرپىندى دەپ باعالادى، دەپ حابارلايدى اقوردا ءباسپاسوز قىزمەتى، infohub.kz سايتىنا سىلتەمە جاساپ.
مەملەكەت باسشىسى قازاقستان مەن وڭتۇستىك كورەيا سيفرلىق تەحنولوگيالار سالاسىندا بىرلەسكەن جوبالاردى ىسكە اسىرىپ جاتقانىن اتاپ ءوتتى.
«كورەيا رەسپۋبليكاسى – الەمدىك تەحنولوگيالىق جارىستىڭ كوشباسشىلارىنىڭ ءبىرى. قازاقستان دا سيفرلىق ترانسفورماسيانىڭ بەلسەندى قاتىسۋشىسىنا اينالدى. استانادا Alem.ai حالىقارالىق ورتالىعى اشىلدى، سۋپەركومپيۋتەرلەر ىسكە قوسىلدى، جاساندى ينتەللەكتكە مامانداندىرىلعان ۋنيۆەرسيتەت جۇمىسىن باستادى. كورەيامەن ءبىرقاتار بىرلەسكەن باستامالار جۇزەگە اسىرىلۋدا. اتاپ ايتقاندا، تۇركىستاندا Woosong ۋنيۆەرسيتەتى اشىلدى، قىزىلوردادا SeoulTech-پەن بىرلەسىپ جاساندى ينتەللەكت ينستيتۋتى قۇرىلدى. ءبىزدىڭ ارىپتەستىگىمىزدىڭ سەرپىندى جوباسى – الەمنىڭ جەتەكشى تەحنولوگيالىق ۋنيۆەرسيتەتتەرىنىڭ ءبىرى KAISTء-تىڭ (كورەيانىڭ وزىق تەحنولوگيالار ۋنيۆەرسيتەتى) Alatau City-دە فيليالىنىڭ اشىلۋى»، – دەدى مەملەكەت باسشىسى.
توقاەۆتىڭ ايتۋىنشا، بيىل كورەيانىڭ عىلىمي-تەحنيكالىق اقپارات ينستيتۋتىمەن بىرلەسىپ قۇرىلعان AI SilkNet پرەديكتيۆتى اناليتيكا جانە فورسايت ورتالىعى دا جۇمىسىن باستادى. ول وسى ورتالىقتىڭ اياسىندا ەكى ەلدىڭ عىلىمي مەكەمەلەرى، ۋنيۆەرسيتەتتەرى مەن تەحنولوگيالىق كومپانيالارىن بىرىكتىرۋدى ۇسىندى.
پرەزيدەنت سونداي-اق كورەيامەن بىرلەسىپ ورتالىق ازيا ەلدەرى ءۇشىن جاساندى ينتەللەكت سالاسىنداعى ماماندار دايارلايتىن AI Talent وڭىرلىك باعدارلاماسىن ىسكە قوسۋدى ماڭىزدى دەپ سانايدى.
پرەزيدەنتتىڭ ايتۋىنشا، بۇل ەكونوميكالىق ءوسۋ مەن عىلىمي پروگرەستى ىنتالاندىراتىن جاڭا تەحنولوگيالىق كەڭىستىك قالىپتاستىرۋعا مۇمكىندىك بەرەدى.
جاساندى ينتەللەكت سالاسىنداعى ىنتىماقتاستىقتان بولەك، تاراپتار سۋتەگى ەنەرگەتيكاسى مەن كومىر گەنەراسياسىن جاڭعىرتۋدى تالقىلادى.
بۇعان دەيىن قازاقستان پرەزيدەنتى قاسىم-جومارت توقاەۆتىڭ «ورتالىق ازيا – كورەيا رەسپۋبليكاسى» سامميتىنە قاتىسقانى حابارلانعان. ول جارتىلاي وتكىزگىشتەر ءوندىرۋ ءۇشىن قازاق-كورەي كومپانياسىن قۇرۋدى ۇسىندى.