شانحايدا وتكەن جاساندى ينتەللەكت جونىندەگى دۇنيەجۇزىلىك كونفەرەنسيا اياسىندا قازاقستان پرەزيدەنتى قاسىم-جومارت توقايەۆ كامبودجا پرەمەر-مينيسترى حۋن مانەتپەن كەزدەستى. كەزدەسۋ بارىسىندا قازاقستاندىق كوشباسشى كامبودجاعا رەسمي ساپارمەن بارۋعا شاقىرۋ الدى. بۇل تۋرالى infohub.kz حابارلايدى.
اقوردانىڭ مالىمەتىنشە، قاسىم-جومارت توقايەۆ قازاقستان كامبودجامەن ىنتىماقتاستىقتى جوعارى باعالايتىنىن، بۇل سەرىكتەستىك بەرىك دوستىق پەن ءوزارا قۇرمەتكە نەگىزدەلگەنىن اتاپ ءوتتى. پرەزيدەنت ەكى ەل اراسىنداعى ساۋدا-ەكونوميكالىق ىنتىماقتاستىقتىڭ وڭ سەرپىن الۋىنا زور الەۋەت بار ەكەنىن جەتكىزدى.
مەملەكەت باسشىسى تاۋار اينالىمىن ارتتىرۋدىڭ باسىم باعىتتارى رەتىندە اۋىل شارۋاشىلىعى، توقىما ونەركاسىبى، تۋريزم، قۇرىلىس، تاماق ونەركاسىبى، كولىك جانە لوگيستيكانى اتادى. قازاقستان استىق، تىڭايتقىشتار جانە باسقا دا اگرارلىق ونىمدەردى جەتكىزۋدى ۇلعايتۋعا دايىن.
سونىمەن قاتار، بۇۇ-نىڭ ەلەكتروندىق ۇكىمەتتى دامىتۋ يندەكسى بويىنشا 24 كوشباسشىنىڭ قاتارىنا كىرەتىن قازاقستان وزىق تەحنولوگيالار سالاسىنداعى تاجىريبەسىمەن بولىسۋگە دايىن.
كامبودجا پرەمەر-مينيسترى حۋن مانەت ءوز ەلىنىڭ قازاقستانمەن قارىم-قاتىناستى نىعايتۋعا مۇددەلى ەكەنىن راستادى. ول ۇكىمەتتەر مەن ىسكەر توپتار اراسىنداعى بايلانىستاردى جانداندىرۋدىڭ ماڭىزدىلىعىن اتاپ ءوتىپ، بىرلەسكەن جوبالاردى جۇزەگە اسىرۋعا جان-جاقتى قولداۋ كورسەتۋگە دايىن ەكەنىن ءبىلدىردى.
اڭگىمەلەسۋ بارىسىندا تاراپتاردىڭ جاھاندىق جانە ايماقتىق قۇرىلىمدار اياسىنداعى ءوزارا ءىس-قيمىلى تۋرالى پىكىر الماسىلدى. قاسىم-جومارت توقايەۆ كامبودجاعا ازياداعى ءوزارا ءىس-قيمىل جانە سەنىم شارالارى جونىندەگى كەڭەستىڭ (اوسشك) قىزمەتىن قولداعانى ءۇشىن العىس ءبىلدىرىپ، پرەمەر-مينيسترگە استانانىڭ بۇۇ اياسىندا حالىقارالىق سۋ ۇيىمىن قۇرۋ جونىندەگى باستاماسى تۋرالى ايتىپ بەردى.
كەزدەسۋدىڭ سوڭىندا حۋن مانەت قازاقستان پرەزيدەنتىن وزىنە ىڭعايلى ۋاقىتتا كامبودجاعا بارۋعا شاقىردى.