قازاقستان پرەزيدەنتى قاسىم-جومارت توقايەۆ ماڭعىستاۋ وبلىسىنداعى توتەنشە جاعداي كەزىندە امان قالعان ءۇش اسكەري قىزمەتشىنى ماراپاتتادى. بۇل تۋرالى اقوردانىڭ ءباسپاسوز قىزمەتى حابارلادى، دەپ جازادى infohub.kz.
مەملەكەت باسشىسىنىڭ جارلىعىمەن اسكەري بورىشىن وتەۋ كەزىندە كورسەتكەن ەرلىگى مەن جانقيارلىعى ءۇشىن «ەرلىگى ءۇشىن» مەدالىمەن 29011 اسكەري ءبولىمىنىڭ ماتروسى (اتقىش) بەكەت باقتىبەك ۇلى قۋاندىق، 29011 اسكەري ءبولىمىنىڭ ماتروسى (اتقىش) اقجول تيمۋر ۇلى تەمەرحان جانە 29011 اسكەري ءبولىمىنىڭ مامانى (سانيتارلىق نۇسقاۋشى) نيكيتا الەكساندروۆيچ ۋدالوۆ ماراپاتتالدى.
كاسپيدەگى تراگەديا 24 قىركۇيەكتە اسكەري-تەڭىز كۇشتەرىنىڭ وقۋ-جاۋىنگەرلىك تاپسىرمالارىن ورىنداۋ بارىسىندا بولدى. داۋىل مەن جەلدىڭ كۇرت ەكپىنىنەن 17 اسكەري قىزمەتشى اشىق تەڭىزگە اعىزىلىپ كەتتى: 14 ادام قازا تاپتى، ۇشەۋىن قۇتقارۋ مۇمكىن بولدى.
توتەنشە جاعدايدىڭ سەبەپتەرى مەن ءمان-جايىن ۆيسە-پرەمەر قانات بوزىمبايەۆ باسقاراتىن ارنايى ۇكىمەتتىك كوميسسيا انىقتاپ جاتىر. ساربازداردىڭ قازا تابۋىنا قاتىستى نەمقۇرايلىلىق پەن كەمە جۇرگىزۋ ەرەجەلەرىن بۇزۋ فاكتىسى بويىنشا قىلمىستىق ءىس تەرگەلۋدە. تەرگەۋ بارىسى باس پروكۋراتۋرانىڭ باقىلاۋىندا.
سونىمەن قاتار، قارساڭىندا مەملەكەت باسشىسى قازاقستان رەسپۋبليكاسى قورعانىس مينيسترلىگىنىڭ ىستەرىنىڭ جاي-كۇيىن كەشەندى تەكسەرۋ ءۇشىن كوميسسيا قۇردى. ول اسكەري بولىمشەلەردىڭ قارجىلىق جانە ماتەريالدىق-تەحنيكالىق قامتاماسىز ەتىلۋىن زەردەلەيدى.
بۇعان دەيىن «كۋرسيۆ» توقايەۆ كاسپي تەڭىزىندەگى وقۋ-جاتتىعۋ كەزىندە قازا تاپقان اسكەري قىزمەتشىلەردى ولىمىنەن كەيىن ماراپاتتاعانىن جانە قورعانىس ءمينيسترى داۋرەن قوسانوۆتى قىزمەتىنەن بوساتقانىن جازعان. ونىڭ ورنىنا ايدوس مىرزاحمەتوۆ تاعايىندالدى.