استانادا وتكەن قازاقستان حالىق كەڭەسىنىڭ ءبىرىنشى سەسسياسىندا سويلەگەن پرەزيدەنت قاسىم-جومارت توقايەۆ قازاقستان الەمنىڭ ەڭ باسەكەگە قابىلەتتى 40 ەلىنىڭ قاتارىنا ەنگەنىن مالىمدەدى. مەملەكەت باسشىسى ەلدىڭ الەمدىك ارەناداعى ورتا دەرجاۆا مارتەبەسىن بەكىتىپ، قازاقستاننىڭ تاريحى مەن مادەنيەتىن شەتەلدە ناسيحاتتاۋدى كوزدەپ وتىر، دەپ حابارلايدى infohub.kz سايتى.
پرەزيدەنتتىڭ ايتۋىنشا، قازاقستان حالىقارالىق ىنتىماقتاستىقتى دامىتىپ، ينۆەستيسيا تارتۋدى ۇلعايتۋى قاجەت.
«ءبىز بۇدان بىلاي دا حالىقتىڭ ءال-اۋقاتىن ارتتىرۋ جولىندا تاباندى ەڭبەك ەتەمىز. حالىقارالىق ىنتىماقتاستىقتى تەرەڭدەتىپ، ەلگە كەلەتىن ينۆەستيسيا كولەمىن ۇلعايتۋىمىز كەرەك»، — دەدى پرەزيدەنت.
توقايەۆ حالىقارالىق فورۋمدارعا تۇراقتى قاتىسىپ، وزگە ەلدەردىڭ كوشباسشىلارىمەن جانە ينۆەستورلارمەن كەزدەسىپ، استانادا مەملەكەت باسشىلارىمەن جانە حالىقارالىق ۇيىمداردىڭ جەتەكشىلەرىمەن كەلىسسوزدەر جۇرگىزىپ جۇرگەنىن ەسكە سالدى.
«مەنىڭ الدىمداعى ماقساتىم ايقىن – قازاقستاندى الەمدىك ارەنادا ورتا دەرجاۆا رەتىندە تانىتۋ، تاريحىمىز بەن مادەنيەتىمىزدى حالىقارالىق دەڭگەيدە ناسيحاتتاۋ، مەملەكەتتىك مۇددەنى قورعاۋ جانە قازاقستاننىڭ مۇمكىندىكتەرىن ىلگەرىلەتۋ. باسقا ويىم جوق»، — دەدى توقايەۆ.
پرەزيدەنت بۇل مىندەتتى بارلىق قازاقستاندىقتىڭ ماقساتى دەپ تە اتادى. ول ازاماتتارىمىز رەفورمالاردىڭ تىكەلەي كۋاسى بولىپ قانا قويماي، ونىڭ ناتيجەسىن سەزىنىپ جاتقانىن اتاپ ءوتتى.
ماسەلەن، سوڭعى 7 جىلدا جالپى ىشكى ءونىم 29%-عا ءوسىپ، 306 ميلليارد دوللارعا جەتتى. التىن-ۆاليۋتا رەزەرۆتەرى مەن ۇلتتىق قور اكتيۆتەرىنىڭ كولەمى 138 ميلليارد دوللاردان استى. وسى كەزەڭدە ەلىمىزگە 162 ميلليارد دوللاردان استام ينۆەستيسيا تارتىلدى.
مەملەكەت باسشىسىنىڭ ايتۋىنشا، بەلسەندى جۇمىستىڭ ارقاسىندا قازاقستان الەمنىڭ ەڭ باسەكەگە قابىلەتتى 40 ەلىنىڭ قاتارىنا ەندى.