قازاقستان پرەزيدەنتى قاسىم-جومارت توقايەۆ پەن ومان سۇلتانى حايسام بەن تاريق ءال سايد استانا اۋەجايىنىڭ كەلۋ زالىندا قىسقاشا اڭگىمەلەستى، دەپ حابارلايدى اقوردانىڭ ءباسپاسوز قىزمەتى. مەملەكەت باسشىسى وماندىق كوشباسشىنىڭ ساپارىن ەكىجاقتى قاتىناستار ءۇشىن تاريحي دەپ اتاپ، ەلدەر اراسىنداعى سەرىكتەستىكتىڭ زور الەۋەتىن اتاپ ءوتتى، دەپ جازادى infohub.kz سايتى.
«ومان ەكونوميكالىق دامۋدا ايتارلىقتاي جەتىستىكتەرگە قول جەتكىزگەن تابىستى مەملەكەت رەتىندە، سونداي-اق حالىقارالىق دەلدال رەتىندە بەلسەندى جانە سىندارلى ءرول اتقاراتىن ەل رەتىندە كەڭىنەن تانىمال. ءسىزدىڭ ەلىڭىز ءوز ايماعىندا عانا ەمەس، ودان تىس جەرلەردە دە، سونىڭ ىشىندە قازاقستاندا دا لايىقتى بەدەلگە يە. ءبىزدىڭ ەلدەر اراسىنداعى سەرىكتەستىكتىڭ زور الەۋەتى بار ەكەنىنە سەنىمدىمىن، ونى تولىق اشۋ جانە ءتيىمدى جۇزەگە اسىرۋ قاجەت»، — دەدى توقايەۆ.
ءوز كەزەگىندە ومان سۇلتانى قازاقستان پرەزيدەنتىنە جىلى قابىلداۋى ءۇشىن العىس ايتىپ، الداعى كەلىسسوزدەر مازمۇندى ءارى تابىستى بولاتىنىنا سەنىم ءبىلدىردى.
مەملەكەتتىك ساپار باعدارلاماسى جوعارى دەڭگەيدەگى كەلىسسوزدەردى، ءبىرقاتار قۇجاتقا قول قويۋدى جانە ەكى ەل كوشباسشىلارىنىڭ قازاقستان-ومان بيزنەس-فورۋمىنا قاتىسۋىن قامتيدى.
بۇعان دەيىن قاسىم-جومارت توقايەۆ ومان سۇلتانىن ەلوردا اۋەجايىندا جەكە قارسى العان بولاتىن. قازاقستان شەكاراسىن كەسىپ وتكەن ساتتەن استاناعا دەيىن قوناقتىڭ ۇشاعىن قازاقستاندىق يسترەبيتەلدەر سۇيەمەلدەدى. ۇشۋ الاڭىندا قۇرمەت قاراۋىلى مەن پرەزيدەنتتىك وركەستر ساپ تۇزەدى.