حالىق كەڭەسىنىڭ العاشقى سەسسياسىندا قازاقستان پرەزيدەنتى قاسىم-جومارت توقايەۆ جاڭا ورگاننىڭ نەگىزگى جۇمىس باعىتتارىن ايقىندادى، دەپ حابارلايدى infohub.kz سايتى.
مەملەكەت باسشىسى جوعارى كونستيتۋسيالىق مارتەبە العان حالىق كەڭەسىنىڭ قۇرامىندا كەڭىنەن وكىلدىك ەتكەن ەتنومادەني بىرلەستىكتەرمەن دە اينالىساتىنىن اتاپ ءوتتى.
قاسىم-جومارت توقايەۆ ەسكە سالدى: بۇرىن پارلامەنتتىك كۆوتا بويىنشا سەناتقا قازاقستان حالقى اسسامبلەياسىنىڭ 5 مۇشەسى كىرسە، ەندى حالىق كەڭەسىنىڭ قۇرامىندا ەتنومادەني بىرلەستىكتەردىڭ 42 وكىلى بار.
«بۇل — بۇكىل قۇرامنىڭ ۇشتەن ءبىرى. بۇل قازاقستاننىڭ تۇراقتى ءارى تابىستى دامۋى ءۇشىن قحا ميسسياسىنىڭ ماڭىزدىلىعىن ايعاقتايدى. قازىرگى باستى مىندەت — جەمىستى جۇمىسقا باعىت الۋ. ەڭ الدىمەن، ەتنوسارالىق جانە كونفەسسياارالىق كەلىسىمدى نىعايتۋ تاسىلدەرىندە ۇزاق مەرزىمدى ساباقتاستىقتى قامتاماسىز ەتۋ قاجەت. حالىق كەڭەسى بىرلىك پەن كەلىسىمنىڭ جاڭا تۇجىرىمداماسىن ازىرلەيتىن ورتالىققا اينالا الادى. باسقاشا ايتقاندا، حالىق كەڭەسى ەتنومادەني بىرلەستىكتەر مەن وسى سالادا جۇمىس ىستەيتىن وزگە دە قوعامدىق ۇيىمداردى بىرىكتىرۋمەن اينالىسادى»، — دەپ تۇيىندەدى پرەزيدەنت.
ول وڭىرلەردە دوستىق ۇيلەرىنىڭ بازاسىندا «قوعامدىق كەلىسىم» جەلىسى جۇمىسىن جالعاستىراتىنىن قوستى. ەتنومادەني بىرلەستىكتەر جەرگىلىكتى قوعامدىق كەڭەستەردە وكىلدىك ەتىپ، تۇراقتى كوميتەتتەردىڭ، سالالىق كوميسسيالاردىڭ جانە قازاقستان حالىق كەڭەسىنىڭ كونسۋلتاتيۆتىك-كەڭەسشى ورگاندارىنىڭ جۇمىسىنا قاتىسا الادى.