قازاقستان پرەزيدەنتى قاسىم-جومارت توقايەۆ قىتايلىق ارىپتەستەرىنە تاۋارلاردىڭ ينتەرنەتتەگى دەرەكتەر سياقتى جىلدام شەكارادان وتۋىنە مۇمكىندىك بەرەتىن كەڭىستىك قۇرۋدى ۇسىندى، دەپ حابارلايدى infohub.kz.
مەملەكەت باسشىسى بۇل مالىمدەمەنى جۇڭگو حالىق رەسپۋبليكاسىنىڭ جەتەكشى كومپانيالارى وكىلدەرىمەن كەزدەسۋدە جاسادى.
پرەزيدەنتتىڭ ايتۋىنشا، قازاقستاننىڭ لوگيستيكا سالاسىنداعى باستى جوباسى – Smart Cargo پلاتفورماسى. ول كەدەندىك، لوگيستيكالىق جانە كوممەرسيالىق قىزمەتتەردى بىرىكتىرەتىن ءبىرىڭعاي سيفرلىق تەرەزە.
«قازاقستان مەن جۇڭگو حالىقارالىق ساۋدانىڭ تيىمدىلىگىن ارتتىراتىن جاڭا جاھاندىق ستاندارتتاردى بىرلەسىپ بەلگىلەي الادى دەپ ەسەپتەيمىن. تەحنولوگيا، لوگيستيكا سالاسىنداعى قىتايلىق كومپانيالار مەن ينفراقۇرىلىم ينۆەستورلارىن وسى اۋقىمدى باستامانى جۇزەگە اسىرۋعا بەلسەندى قاتىسۋعا شاقىرامىن»، — دەدى توقايەۆ.
سونداي-اق مەملەكەت باسشىسى قازاقستان قىتايدى ورتالىق ازيامەن، كاۆكازبەن، تاياۋ شىعىسپەن جانە ەۋروپامەن بايلانىستىراتىن نەگىزگى كولىكتىك-لوگيستيكالىق حابقا اينالۋى كەرەكتىگىن اتاپ ءوتتى. ول مۇنى ستراتەگيالىق ماقسات دەپ اتادى.
«ءقازىر ەلىمىزدىڭ اۋماعى ارقىلى 13 حالىقارالىق كولىك ءدالىزى وتەدى. جۇڭگو مەن ەۋروپا اراسىنداعى تەمىرجول تاسىمالىنىڭ شامامەن 85 پايىزى قازاقستان ارقىلى جۇزەگە اسىرىلادى»، — دەپ ەسكە سالدى پرەزيدەنت.
سونىمەن قاتار توقايەۆ كولىك ءدالىزىنىڭ باسەكەگە قابىلەتتىلىگى قازىرگى الەمدە دەرەكتەر الماسۋ جىلدامدىعىنا، سيفرلىق ينتەگراسيا دەڭگەيىنە جانە لوگيستيكانىڭ اشىقتىعىنا بايلانىستى ەكەنىن ايتتى.