قازاقستان پرەزيدەنتى قاسىم-جومارت توقايەۆ «ورتالىق ازيا – كورەيا رەسپۋبليكاسى» بيزنەس-سامميتىندە ءسوز سويلەپ، كورەي كومپانيالارىنا ەۋرازيا نارىعىنا باعىتتالعان ءونىمدى بىرلەسىپ شىعارۋدى ۇسىندى، دەپ حابارلايدى infohub.kz سايتى.
مەملەكەت باسشىسى ءسوزىنىڭ ءبىر بولىگىن اۋىل شارۋاشىلىعىنا ارنادى. توقاەۆتىڭ ايتۋىنشا، بىلتىر قازاقستان رەكوردتىق كولەمدە استىق جينادى — شامامەن 27 ملن توننا.
پرەزيدەنت رەسپۋبليكا اگروونەركاسىپ ونىمدەرىن الەمنىڭ 70-تەن استام ەلىنە ەكسپورتتايتىنىن ەسكە سالدى.
«قازاقستاننىڭ جەر رەسۋرستارى مول، ال كورەيا — ءتيىمدى ءارى تەحنولوگيالىق اۋىل شارۋاشىلىعى سالاسىندا تانىلعان كوشباسشى»، — دەدى ول.
سونىمەن قاتار مەملەكەت باسشىسى ەكى ەلدىڭ كۇشىن بىرىكتىرىپ، ءونىم وندىرۋگە، تەرەڭ وڭدەۋگە جانە سىرتقى نارىققا ەكسپورتتاۋعا باعىتتالعان بىرلەسكەن تاعام ونەركاسىبى كلاستەرىن قۇرۋدى ۇسىندى.
«قازاقستان كورەي كومپانيالارىنا تەك سىيىمدى نارىق قانا ەمەس، ءوندىرىس ورنالاستىرۋعا، تەحنولوگيا ەنگىزۋگە جانە ەۋرازيا قۇرلىعىنىڭ نارىقتارىنا شىعۋعا كەڭ مۇمكىندىكتەر ۇسىنادى»، — دەپ قوستى پرەزيدەنت.
قازاقستاندىق كوشباسشىنىڭ پىكىرىنشە، بۇل كورەي بيزنەسىنە جاڭا پەرسپەكتيۆالار اشىپ، بۇكىل ايماققا ناقتى اسەر بەرەدى.
بۇعان دەيىن «كۋرسيۆ» توقاەۆتىڭ كورەياعا ورتالىق ازيامەن جۇمىستىڭ جاڭا فورمۋلاسىن ۇسىنعانىن جازعان بولاتىن.