قازاقستان پرەزيدەنتى قاسىم-جومارت توقايەۆ قورعانىس ءمينيسترى داۋرەن قوسانوۆتى قىزمەتىنەن بوساتتى. بۇل وتستاۆكا كاسپي تەڭىزىندەگى وقۋ-جاتتىعۋ كەزىندە 14 اسكەري قىزمەتشىنىڭ قازا تابۋىنا بايلانىستى بولدى، دەپ حابارلايدى infohub.kz سايتى.
«مەملەكەت باسشىسىنىڭ جارلىعىمەن قوسانوۆ داۋرەن جۇماتاي ۇلى قازاقستان رەسپۋبليكاسىنىڭ قورعانىس ءمينيسترى قىزمەتىنەن بوساتىلدى»، — دەلىنگەن اقوردا حابارلاماسىندا.
بۇعان دەيىن قوسانوۆ ماڭعىستاۋ وبلىسىنا بارىپ، كاسپي تەڭىزىندەگى وقۋ-جاتتىعۋ كەزىندە قازا تاپقان ءتورت مەرزىمدى اسكەري قىزمەتشىنىڭ وتباسىلارىنا كوڭىل ايتتى. ول تۋىستارىنا جان-جاقتى قولداۋ كورسەتۋگە ۋادە بەردى.
قايعىلى وقيعا 24 قىركۇيەكتە كاسپيدەگى اسكەري-تەڭىز كۇشتەرىنىڭ وقۋ-جاۋىنگەرلىك تاپسىرمالارىن ورىنداۋ بارىسىندا بولدى. داۋىل مەن قاتتى جەلدىڭ سالدارىنان 17 اسكەري قىزمەتشى اشىق تەڭىزگە اعىزىلىپ كەتتى: 14 ادام قازا تاپتى، ۇشەۋىن قۇتقارىپ قالۋ مۇمكىن بولدى. پرەزيدەنت قاسىم-جومارت توقايەۆ 25 قىركۇيەكتى جالپىۇلتتىق ازا تۇتۋ كۇنى دەپ جاريالادى.
توتەنشە جاعدايدىڭ سەبەپتەرى مەن ءمان-جايىن ۆيسە-پرەمەر قانات بوزىمبايەۆ باسقاراتىن ارنايى ۇكىمەتتىك كوميسسيا انىقتاپ جاتىر. ساربازداردىڭ قازا تابۋىنا قاتىستى نەمقۇرايلىلىق پەن كەمە جۇرگىزۋ ەرەجەلەرىن بۇزۋ فاكتىسى بويىنشا قىلمىستىق ءىس تەرگەلىپ جاتىر، ونىڭ بارىسى باس پروكۋراتۋرانىڭ جەكە باقىلاۋىندا. تەرگەۋ اياسىندا 30-دان استام ادام جاۋاپقا تارتىلىپ، كۇدىكتى لاۋازىمدى تۇلعالاردىڭ شەڭبەرى ايقىندالدى.
كەيىنىرەك كاسپي تەڭىزىنەن تاعى ەكى اسكەري قىزمەتشىنىڭ دەنەسى تابىلدى.
بۇعان دەيىن «كۋرسيۆ» قورعانىس مينيسترلىگىنىڭ بەس لاۋازىمدى تۇلعاسى اسكەري قىزمەتشىلەردىڭ قازا تابۋىنا قاتىستى ءىس بويىنشا ۇستالعانىن جازعان. كۇدىكتىلەردىڭ قاتارىندا قازاقستان اسكەري-تەڭىز كۇشتەرى باس قولباسشىسىنىڭ ءبىرىنشى ورىنباسارى جانە جەكە قۇرامدى ءتۇسىرۋ جۇرگىزىلگەن «قايسار» كاتەرىنىڭ كومانديرى بار.
كەشە مەملەكەت باسشىسى قورعانىس مينيسترلىگىنىڭ ىستەرىنىڭ جاي-كۇيىن كەشەندى تەكسەرۋ ءۇشىن كوميسسيا قۇردى. ول اسكەري بولىمشەلەردىڭ قارجىلىق جانە ماتەريالدىق-تەحنيكالىق قامتاماسىز ەتىلۋىن دە زەردەلەيدى.