قازاقستان پرەزيدەنتى قاسىم-جومارت توقايەۆ قازاقستان رەسپۋبليكاسى قورعانىس مينيسترلىگىندەگى ىستەردىڭ جاي-كۇيىن كەشەندى تەكسەرۋ جونىندەگى كوميسسيا قۇرۋ تۋرالى وكىمگە قول قويدى. بۇعان ماڭعىستاۋدا وقۋ-جاۋىنگەرلىك تاپسىرمانى ورىنداۋ كەزىندە اسكەري قىزمەتشىلەردىڭ قازا تابۋى سەبەپ بولدى، دەپ حابارلايدى infohub.kz سايتى.
«مەملەكەت باسشىسىنىڭ وكىمىمەن قازاقستان رەسپۋبليكاسى قورعانىس مينيسترلىگىندەگى ىستەردىڭ جاي-كۇيىن كەشەندى تەكسەرۋ جونىندەگى كوميسسيا قۇرىلدى»، — دەلىنگەن اقوردانىڭ تەلەگرام-ارناسىنداعى حابارلامادا. قۇجاتتىڭ تولىق ءماتىنى اقوردانىڭ رەسمي سايتىندا جاريالاندى.
وكىمدە تەكسەرۋ قورعانىس ۆەدومستۆوسىنداعى ىستەردىڭ جاي-كۇيىن، ونىڭ ىشىندە اسكەري بولىمشەلەردى قارجىلىق جانە ماتەريالدىق-تەحنيكالىق قامتاماسىز ەتۋ سالاسىن كەشەندى تالداۋ ماقساتىندا جۇرگىزىلەتىنى كورسەتىلگەن.
كوميسسيا ءتوراعاسى بولىپ قازاقستان رەسپۋبليكاسى قاۋىپسىزدىك كەڭەسى ءتوراعاسىنىڭ ورىنباسارى ايدا عالىم قىزى بالاەۆا تاعايىندالدى. ونىڭ ورىنباسارى — قازاقستان رەسپۋبليكاسى جوعارى اۋديتورلىق پالاتاسىنىڭ ءتوراعاسى ءاليحان اسحان ۇلى سمايىلوۆ.
كوميسسيا قۇرامىنا مىنالار كىردى: قازاقستان رەسپۋبليكاسى پرەزيدەنتى اكىمشىلىگى باسشىسىنىڭ ورىنباسارى ەرجان نۇرلان ۇلى جيەنبايەۆ؛ قازاقستان رەسپۋبليكاسى قارجىلىق مونيتورينگ اگەنتتىگىنىڭ ءتوراعاسى جانات قالدىبەك ۇلى ەليمانوۆ؛ قازاقستان رەسپۋبليكاسى قاۋىپسىزدىك كەڭەسى اپپاراتىنىڭ باسشىسى مۇرات قاليبەك ۇلى بايمۇقاشيەۆ؛ قازاقستان رەسپۋبليكاسىنىڭ قارجى ءمينيسترى ءمادي توكەش ۇلى تاكييەۆ؛ قازاقستان رەسپۋبليكاسى باس پروكۋراتۋراسىنىڭ ءبىرىنشى ورىنباسارى جاندوس جانىبەك ۇلى ۋميرالييەۆ؛ قازاقستان رەسپۋبليكاسى ۇلتتىق قاۋىپسىزدىك كوميتەتى ءتوراعاسىنىڭ ءبىرىنشى ورىنباسارى ءالي ساپارعالي ۇلى التىنبايەۆ؛ قازاقستان رەسپۋبليكاسى ۇلتتىق ەكونوميكا ءبىرىنشى ۆيسە-مينيسترى ازامات كەمەنگەر ۇلى امرين.
قۇجاتقا سايكەس، كوميسسياعا جەتى كۇندىك مەرزىمدە اتقارىلعان جۇمىستىڭ العاشقى ناتيجەلەرىن بايانداۋ تاپسىرىلدى. وكىم قول قويىلعان كۇنىنەن باستاپ كۇشىنە ەنەدى.
ەسكە سالايىق، 24 قىركۇيەكتە وقۋ-جاۋىنگەرلىك تاپسىرمانى ورىنداۋ بارىسىندا اۋا رايىنىڭ كەنەتتەن كۇرت ناشارلاۋى مەن ەكپىندى جەلدىڭ سالدارىنان كاسپي تەڭىزىنە 17 اسكەري قىزمەتشى اعىزىلىپ كەتتى، ولاردىڭ 14ء-ى قازا تاپتى. ۇشەۋى قۇتقارىلدى، بىرەۋى اۋرۋحاناعا جات قىزىلدى.
الدىڭعى كۇنى ءوڭىردىڭ دەنساۋلىق ساقتاۋ باسقارماسى پاسيەنتتىڭ ماڭعىستاۋ وبلىستىق كوپبەيىندى اۋرۋحاناسىنا جەتكىزىلگەنىن حابارلادى. اسكەري قىزمەتشىنىڭ جاعدايى تۇراقتى اۋىر دەپ باعالاندى.
بۇگىن ماڭعىستاۋدا قازا تاپقان اسكەري قىزمەتشىلەرمەن قوشتاسۋ ءراسىمى ءوتتى.