قازاقستان پرەزيدەنتى قاسىم-جومارت توقايەۆ ەلدىڭ ۇلتتىق قۇراماسىن VI دۇنيەجۇزىلىك كوشپەندىلەر ويىندارىنداعى تابىستى ونەرىمەن قۇتتىقتادى. بۇل تۋرالى قازاقستان رەسپۋبليكاسى پرەزيدەنتىنىڭ كەڭەسشىسى – ءباسپاسوز حاتشىسى ايبەك سمادياروۆ حابارلادى، دەپ جازادى infohub.kz سايتى.
مەملەكەت باسشىسى بۇل جەتىستىك قازاقستاندىق سپورتشىلاردىڭ جوعارى جىگەرىنىڭ، ەڭبەكقورلىعىنىڭ جانە تەمىردەي قايسارلىعىنىڭ ارقاسىندا مۇمكىن بولعانىن اتاپ ءوتتى.
«مەملەكەت باسشىسى چەمپيوندار مەن جۇلدەگەرلەرگە، جاتتىقتىرۋشىلار شتابىنا جانە ۇلتتىق سپورت تۇرلەرى دامىعان ەل رەتىندە قازاقستاننىڭ حالىقارالىق بەدەلىن نىعايتۋعا ۇلەس قوسقان بارلىق ماماندارعا العىس ءبىلدىردى. قاسىم-جومارت توقايەۆ سپورتشىلارىمىزعا ەڭ بەدەلدى جارىستاردا جاڭا جارقىن جەڭىستەر تىلەدى»، — دەلىنگەن حابارلامادا.