«قازاقستان — جۇڭگو» ينۆەستيسيالىق فورۋمىندا قازاقستان پرەزيدەنتى قاسىم-جومارت توقايەۆ قىتايمەن ماڭگىلىك دوستىقتى نىعايتۋ رەسپۋبليكانىڭ سىرتقى ساياساتىنداعى ەڭ ماڭىزدى ماقساتتاردىڭ ءبىرى ەكەنىن مالىمدەدى، دەپ حابارلايدى infohub.kz سايتى.
ەكى حالىقتىڭ ورتاق تاريحىنا توقتالعان مەملەكەت باسشىسى جۇڭگو حالقى قازاق حالقىنا ەشقاشان ەشقانداي زيان تيگىزبەگەنىن اتاپ ءوتتى. ونىڭ ايتۋىنشا، كوپ جىلدار بويى ەكى حالىق ءوزارا قۇرمەت ساقتاپ، بىر-بىرىنە قولداۋ كورسەتە وتىرىپ، شىنايى ۇيلەسىمدە ءومىر ءسۇرىپ كەلەدى.
«ورتاق تاريحىمىزعا ۇڭىلسەك، جۇڭگو حالقى ءبىزدىڭ حالقىمىزعا ەشقاشان ەشقانداي زيان تيگىزگەن ەمەس. كوپ جىلدار بويى ەكى حالىق ءوزارا قۇرمەت ساقتاپ، بىر-بىرىنە قولداۋ كورسەتە وتىرىپ، شىنايى ۇيلەسىمدە ءومىر ءسۇردى»، — دەدى قازاقستان پرەزيدەنتى.
قاسىم-جومارت توقايەۆ قازىرگى تۇراقسىز ءارى بەلگىسىز ۋاقىتتا قازاقستان مەن جۇڭگو سەنىمدى سەرىكتەس رەتىندە كوپتەگەن سىن-قاتەرلەر مەن قاۋىپتەرگە قارسى تۇرۋ ءۇشىن يىق تىرەسىپ، بىرلەسىپ ارەكەت ەتۋى كەرەكتىگىن قوستى.
ءسوزىن قورىتىندىلاي كەلە، مەملەكەت باسشىسى جۇڭگو ماقالىن كەلتىردى: «جۇڭگو تىلىندە ماعىناسى تەرەڭ ءبىر ماقال بار: 人心齐，泰山移 — „ادامدار بىرىكسە، تايشان تاۋىن دا ورنىنان قوزعايدى“. قازاقستان مەن جۇڭگو دوستىق پەن كورشىلەس ەكى مەملەكەت رەتىندە بىرلەسىپ كەز كەلگەن ءىستى ءساتتى جۇزەگە اسىرا الاتىنىنا سەنىمدىمىن»، — دەپ تۇيىندەدى قاسىم-جومارت توقايەۆ.