قازاقستان پرەزيدەنتى قاسىم-جومارت توقايەۆ Linde GmbH كومپانياسىنىڭ اعا ۆيسە-پرەزيدەنتى وليۆەر پفاننمەن كەزدەستى. كەزدەسۋدە ينۆەستيسيا كولەمى 500 ميلليون دوللارعا جەتەتىن جاڭا جوبالار تالقىلاندى. بۇل تۋرالى اقوردا حابارلادى، دەپ جازادى infohub.kz.
مەملەكەت باسشىسى نەمىس كومپانياسىنىڭ رەسپۋبليكاداعى قىزمەتىن كەڭەيتۋ جوسپارلارىن قۇپتادى. كەزدەسۋگە قاتىسۋشار Linde مەن Qarmet كومپانيالارى اراسىندا تەمىرتاۋدا جاڭا اۋا ءبولۋ قوندىرعىسىن سالۋ تۋرالى كەلىسىمگە قول قويىلعانىن اتاپ ءوتتى.
تاراپتار مۇناي-حيميا ونەركاسىبىندەگى بىرلەسكەن جوبالاردى جۇزەگە اسىرۋ پەرسپەكتيۆالارىن قاراستىردى. قاسىم-جومارت توقايەۆ اتىراۋ جانە ماڭعىستاۋ وبلىستارىنداعى مۇناي-حيميا جانە حيميا كلاستەرلەرىنىڭ دامۋى تۋرالى اڭگىمەلەپ، Linde كومپانياسىن وسى سالالارداعى پەرسپەكتيۆالى جوبالارعا قاتىسۋعا شاقىردى.
پرەزيدەنت كومپانيانىڭ كومىرتەكتى ۇستاۋ جانە ساقتاۋ سالاسىنداعى ازىرلەمەلەرىنە، سونداي-اق سۋتەگى ينفراقۇرىلىمىن دامىتۋ جوسپارلارىنا ەرەكشە نازار اۋداردى. ونىڭ ايتۋىنشا، بۇل باعىتتار قازاقستاننىڭ «جاسىل» ەكونوميكاعا كوشۋ مىندەتتەرىنە ساي كەلەدى.
مەملەكەت باسشىسى Linde كومپانياسىنىڭ ەلدىڭ ونەركاسىپ سەكتورىنا قوسقان ۇلەسىن جوعارى باعالادى. كومپانيا ونەركاسىپتىك گازدار مەن ينجينيرينگ سالاسىندا الەمدىك كوشباسشىلاردىڭ قاتارىندا. ونىڭ تەحنولوگيالارى مەتاللۋرگيا، تاۋ-كەن، حيميا جانە ەنەرگەتيكا سالالارىندا، دەنساۋلىق ساقتاۋ، ەلەكتروندىق ونەركاسىپ جانە جوعارى تەحنولوگيالىق وندىرىستە قولدانىلادى.
وليۆەر پفانن قاسىم-جومارت توقاەۆقا Linde باستامالارىن قولداعانى ءۇشىن العىس ايتىپ، سەرىكتەستىكتى كەڭەيتۋگە جانە قازاقستاندا جاڭا وندىرىستەر اشۋعا دايىن ەكەنىن ءبىلدىردى.
بۇعان دەيىن «كۋرسيۆ» Siemens كومپانياسىنىڭ قازاقستاندا دەرەكتەردى وڭدەۋ ورتالىعىنىڭ ينفراقۇرىلىمىن قۇرۋعا قاتىسۋعا جانە ەلەكتر جەلىلەرىن جاڭعىرتۋ، اۆتوماتتاندىرۋ مەن سۋمەن جابدىقتاۋ ءۇشىن شەشىمدەر ۇسىنۋعا دايىن ەكەنىن جازعان بولاتىن. توقاەۆپەن كەزدەسۋدە Siemens پەن Silk Road Electronics كومپانيالارىنىڭ Qarmet جابدىقتارىن جاڭارتۋ جونىندەگى بىرلەسكەن جوباسى دا تالقىلاندى.
گەرمانياعا ساپارى بارىسىندا قاسىم-جومارت توقايەۆ جاڭا ستراتەگيالىق ۋاعدالاستىقتارعا قول جەتكىزىلگەنىن مالىمدەپ، كانسلەر فريدريح مەرستى 2027 جىلى قازاقستانعا مەملەكەتتىك ساپارمەن كەلۋگە شاقىردى.
گەرمانيا پرەزيدەنتى فرانك-ۆالتەر شتاينمايەرمەن كەلىسسوزدەر قورىتىندىسى بويىنشا تاراپتار بىرلەسكەن دەكلاراسيا قابىلدادى. 2025 جىلى ەكى ەل اراسىنداعى تاۋار اينالىمى 4،5 ميلليارد دوللارعا جەتتى، ال سوڭعى 20 جىلدا قازاقستانعا نەمىس ينۆەستيسيالارىنىڭ اعىنى 8 ميلليارد دوللاردى قۇرادى. فرانك-ۆالتەر شتاينمايەر «التىن قىران» وردەنىمەن ماراپاتتالدى.