اقوردادا پرەزيدەنت قاسىم-جومارت توقايەۆ حالىقارالىق وليمپيادالاردىڭ جەڭىمپازدارى مەن جۇلدەگەرلەرى – وقۋشىلار مەن ستۋدەنتتەرمەن كەزدەستى. سالتاناتتى شاراعا 21 لاۋرەات، سونداي-اق ولاردىڭ مۇعالىمدەرى مەن تالىمگەرلەرى شاقىرىلدى. لاۋرەاتتار اراسىندا فيزيكا، حيميا، بيولوگيا، ماتەماتيكا، ينفورماتيكا، گەوگرافيا جانە لينگۆيستيكا پاندەرىنەن التىن، كۇمىس جانە قولا مەدالداردى يەلەنگەندەر بار. مەملەكەت باسشىسى دارىندى جاستاردى عىلىمي جارىستارداعى جارقىن ناتيجەلەرىمەن قۇتتىقتاپ، ولارعا شىنايى ريزاشىلىعىن ءبىلدىردى، دەپ حابارلايدى infohub.kz.
– سىزدەر پلانەتانىڭ ۇزدىك وقۋشىلارىمەن باسەكەدە بىلىمدەرىنىڭ ەڭ جوعارى دەڭگەيىن كورسەتىپ، بەدەلدى ينتەللەكتۋالدى جارىستاردا جۇلدەلى ورىندارعا لايىقتى يە بولدىڭىزدار. سىزدەردىڭ كۇش-جىگەرلەرىڭىز ءبىزدىڭ كوك بايراعىمىزدى بيىك كوتەرىپ، قازاقستاننىڭ حالىقارالىق بەدەلىن نىعايتتى. قازاقستاننىڭ جارقىن بولاشاعى – تالانتتى، ءبىلىمدى جانە قابىلەتتى جاستاردىڭ قولىندا. ءارقايسىڭىز – ەلىمىزدىڭ ناعىز ماقتانىشىسىزدار! – دەپ اتاپ ءوتتى پرەزيدەنت.
قاسىم-جومارت توقايەۆ تاباندى ەڭبەكپەن يەلەنگەن ءاربىر مەدالدىڭ باعا جەتپەس ەكەنىن جانە ماڭىزدى ەكەنىن ايتتى.
– كۇن سايىن، اي سايىن جوعارى ماقساتقا جەتۋ ءۇشىن ۇزدىكسىز وقۋ جانە دايىندالۋ قابىلەتى – تەرەڭ تارتىپتىلىك پەن كۇشتى مىنەزدىڭ شىنايى كورىنىسى. ۇلى ابايدىڭ ءسوزى بار: «ءۇش-اق نارسە ادامنىڭ قاسيەتى: ىستىق قايرات، نۇرلى اقىل، جىلى جۇرەك». جاقىندا سىزدەر بىلىكتى ينجەنەرلەر، كورنەكتى عالىمدار، ءوز ءىسىنىڭ ناعىز ماماندارى بولاسىزدار. سىزدەر وتانىمىزدىڭ وركەندەۋىنە ىقپال ەتەتىن وزىق تەحنولوگيالار جاساپ، الەمدىك پروگرەسكە زور ۇلەس قوساتىن جاڭالىقتار اشاسىزدار دەپ سەنەمىن، – دەدى ول.