قازاقستان پرەزيدەنتى قاسىم-جومارت توقايەۆ ومبىدا وتكەن XXII ءوڭىرارالىق ىنتىماقتاستىق فورۋمى اياسىندا رەسەي پرەزيدەنتى ۆلاديمير پۋتينمەن كەزدەسۋدە ەكىجاقتى ىنتىماقتاستىقتىڭ نەگىزگى ماسەلەلەرىن، سونىڭ ىشىندە قازاقستانداعى العاشقى اتوم ەلەكتر ستانسياسىنىڭ قۇرىلىسىن تالقىلادى، دەپ حابارلايدى infohub.kz سايتى.
قاسىم-جومارت توقايەۆ ۆلاديمير ءپۋتيندى جىلى قابىلداعانى ءۇشىن العىس ايتىپ، قازاق-رەسەي ىنتىماقتاستىعىنىڭ نەگىزگى باعىتتارى بويىنشا مازمۇندى ديالوگتى جالعاستىرۋدىڭ ماڭىزدىلىعىن اتاپ ءوتتى. «ءبىز وتە ءىرى ساۋدا سەرىكتەستەرىمىز. 2025 جىلى ساۋدا كولەمى شامامەن 28 ملرد دوللاردى قۇرادى، ءارى بيىلعى جىلدىڭ ءۇردىسى وتە وڭ. 2025 جىلدىڭ 5 ايىمەن سالىستىرعاندا، وسى 5 اي ءوزارا ساۋدانىڭ جاقسى ءوسىمىن كورسەتتى. ينۆەستيسيالارعا كەلەر بولساق، رەسەي ءبىزدىڭ ەكونوميكامىزعا ينۆەستورلار اراسىندا ءبىرىنشى ورىنعا شىعىپ وتىر. ينۆەستيسيا كولەمى 30 ملرد دوللارعا جۋىقتادى. وتە قىزىقتىسى، ءبىزدىڭ ەكىجاقتى كۇش-جىگەرىمىزبەن 177 پەرسپەكتيۆالى ونەركاسىپتىك جوبانىڭ پۋلى ىرىكتەلدى، ونىڭ 122ء-سى جۇزەگە اسىرىلدى. ال وسى 177 جوبانىڭ جالپى كولەمى 53 ملرد دوللاردى قۇرايدى. بۇل قازىرگى كۇردەلى گەوساياسي جاعدايدى ەسكەرسەك، ايتارلىقتاي كولەم»، — دەدى قازاقستان پرەزيدەنتى.
مەملەكەت باسشىسى گۋمانيتارلىق سالاداعى ءوزارا ءىس-قيمىل دەڭگەيىن جوعارى باعالاپ، رەسەيلىك كوشباسشىعا ومبىدا قازاق ۇلتتىق ۋنيۆەرسيتەتىنىڭ فيليالىن اشۋعا قولداۋ كورسەتكەنى ءۇشىن العىس ءبىلدىردى. قاسىم-جومارت توقايەۆ قازاقستانداعى العاشقى اتوم ستانسياسىن بىرلەسىپ سالۋ جوباسىن ىسكە اسىرۋداعى ىلگەرىلەۋدى اتاپ ءوتتى.
«ماعان بالقاش كولى ماڭىنداعى الاڭدا دالالىق جۇمىستار اياقتالىپ جاتقانىن حابارلادى. بۇل جوبا قازاقستان اۋماعىندا جاڭا ەنەرگيا ءتۇرىن وندىرۋمەن عانا بايلانىستى ەمەس. بۇل جوبا ەكى مەملەكەتىمىزدى جانە ەڭ باستىسى، ەلدەرىمىزدىڭ حالىقتارىن، اسىرەسە جاس ۇرپاقتى جاقىنداستىراتىن جوبا. ويتكەنى ءبىز رەسەيدىڭ كومەگىمەن تەحنيكالىق كادرلاردى — جەرگىلىكتى، قازاق كادرلارىن دايارلاۋ تۋرالى ءسوز قوزعاپ وتىرمىز. ولار كەيىن اتوم يندۋسترياسى سياقتى وتە كۇردەلى سالادا جۇمىس ىستەي الاتىن بولادى»، — دەپ سانايدى پرەزيدەنت.