قازاقستان پرەزيدەنتى قاسىم-جومارت توقايەۆ گەرمانياداعى بريفينگتە بۇعان دەيىن ومبىدا ايتقان سوعىستى توقتاتا تۇرۋ تۋرالى مالىمدەمەسىنە تۇسىنىك بەرىپ، رەسەيدەگى احۋالعا دا باعا بەردى، دەپ حابارلايدى infohub.kz سايتى.
بۇل سۇراقتى مەملەكەت باسشىسىنا ARD تەلەارناسىنىڭ ءتىلشىسى دەميان فون وستەن قويدى. جۋرناليست قازاقستان پرەزيدەنتىنەن ومبىدا سوعىستى توقتاتا تۇرۋ قاجەتتىگى تۋرالى ايتقان ءسوزىن ءتۇسىندىرىپ، رەسەيدەگى جاعدايعا باعا بەرۋىن سۇرادى.
«بۇگىن مەن ايتارلىقتاي سەنىممەن ايتتىم: پرەزيدەنت پۋتين مەملەكەت قايراتكەرى رەتىندە، رەسەيدىڭ باسشىسى رەتىندە — سىزدەرگە قانشالىقتى وعاش ەستىلسە دە — ورتالىق ازيا ءۇشىن دە، ونىڭ ىشىندە قازاقستان ءۇشىن دە، ەۋروپا مەن بۇكىل الەم ءۇشىن دە ەڭ قولايلى ساياسي تۇلعا. مەن ونى جاقسى بىلەمىن، ول تاريحى كۇردەلى ۇلكەن مەملەكەتتى باسقارۋعا قاجەتتى قاسيەتتەرگە يە، ءوز ەلىنىڭ الدىندا تۇرعان ستراتەگيالىق ماقساتتارىن تەرەڭ تۇسىنەدى»، — دەدى قاسىم-جومارت توقايەۆ.
قازاقستان پرەزيدەنتى سونداي-اق ۋكراينادا بولىپ جاتقان جاعدايدى ءبارى الاڭداۋشىلىقپەن قاداعالاپ وتىرعانىن اتاپ ءوتتى. ونىڭ ايتۋىنشا، قازاقستان باسىنان باستاپ بىرىككەن ۇلتتار ۇيىمى جارعىسىنىڭ ەرەجەلەرىن ۇستاناتىنىن ايتىپ كەلگەن.
«ءبىز بارلىق مەملەكەتتىڭ اۋماقتىق تۇتاستىعى قاعيداتىن قۇرمەتتەۋگە جانە ساقتاۋعا باسا ءمان بەرەمىز. باسىنان باستاپ ۋكراين حالقىن، ونىڭ تاريحىن، مادەنيەتىن، داستۇرلەرىن جانە، ارينە، ۋكراين ءتىلىن زور قۇرمەتتەيتىنىمىزدى ايتىپ كەلدىك»، — دەدى مەملەكەت باسشىسى.
سونىمەن قاتار قاسىم-جومارت توقايەۆ سوعىستى توقتاتا تۇرۋ تۋرالى مالىمدەمەسىنىڭ ءمانىن ناقتىلادى. «مەن سوعىستى دەرەۋ توقتاتۋ كەرەك دەپ ايتقان جوقپىن. قازىرگى جاعدايدا ونىڭ ىسكە اسۋى ەكىتالاي ەكەنىن تۇسىنەمىن. مەن ۋكراينا اۋماعىنداعى اسكەري قيمىلداردى توقتاتا تۇرىپ، ديپلوماتيالىق نەمەسە كەز كەلگەن باسقا دا كەلىسسوزدەر ۇدەرىسىنە كوشۋدى ايتىپ وتىرمىن»، — دەپ كەلتىرەدى ونىڭ ءسوزىن اقوردا.