قازاقستان پرەزيدەنتى قاسىم-جومارت توقايەۆ Rhenus Group كومپانيالار توبىنىڭ باسقارما ءتوراعاسى توبياس بارتسپەن كەزدەستى. كەزدەسۋدە تاراپتار كولىك-لوگيستيكا سالاسىنداعى ارىپتەستىكتى دامىتۋ مەن بىرلەسكەن ينفراقۇرىلىمدىق جوبالاردى تالقىلادى، دەپ حابارلايدى infohub.kz سايتى.
مەملەكەت باسشىسى نەمىس كومپانياسى كوپ جىلدان بەرى قازاقستاننىڭ كولىك بايلانىسىن نىعايتۋعا ۇلەس قوسىپ كەلە جاتقانىن اتاپ ءوتتى. ول ەلدىڭ كونتينەنتتەگى نەگىزگى لوگيستيكالىق ورتالىقتاردىڭ بىرىنە اينالۋعا ۇمتىلىسىن ايرىقشا اتادى.
كەلىسسوزدەردە ترانسكاسپي حالىقارالىق كولىك باعدارىن دامىتۋعا ەرەكشە نازار اۋدارىلدى. توقايەۆ زاماناۋي پورتتار، تەرمينالدار، تەمىرجولدار مەن سيفرلىق سەرۆيستەردى قامتيتىن باسەكەگە قابىلەتتى باعدار قۇرۋدى بىرلەسىپ قولعا الۋدى ۇسىندى. سونداي-اق ول Rhenus كومپانياسىنىڭ اقتاۋ پورتىنداعى مۋلتيمودالدى حاب جوباسىنا قاتىسۋىن قولدادى.
ءوز كەزەگىندە توبياس بارتس قازاقستاندى كولىك-لوگيستيكالىق توراپ رەتىندە زور الەۋەتكە يە دەپ باعالايتىنىن مالىمدەپ، كومپانيانىڭ بىرلەسكەن جوبالارعا قاتىسۋعا مۇددەلى ەكەنىن راستادى.
كەزدەسۋ قورىتىندىسى بويىنشا تاراپتار ىنتىماقتاستىقتى كەڭەيتۋگە كەلىستى.
انىقتاما: Rhenus Group — شتاب-پاتەرى حولسۆيككەدە ورنالاسقان، 1912 جىلى قۇرىلعان نەمىس لوگيستيكالىق كومپانياسى. ونىڭ الەم بويىنشا 1 100-دەن استام وكىلدىگى بار، شتاتى شامامەن 39–41 مىڭ قىزمەتكەردى قۇرايدى، ال جىلدىق ءتۇسىمى 8،2 ملرد ەۋروعا جەتەدى. Rhenus كەلىسىمشارتتىق لوگيستيكا، جۇك تاسىمالى، پورت قىزمەتتەرى جانە قوعامدىق كولىك سالالارىندا جۇمىس ىستەيدى. اتاپ ايتقاندا، كومپانيا ۇزاق ۋاقىت بويى IKEA-نىڭ نەگىزگى لوگيستيكالىق سەرىكتەسى بولىپ كەلەدى جانە گەرمانيا مەن نيدەرلاندىدا كۇن پانەلدەرى مەن گەوتەرمالدى جىلىتۋ جۇيەلەرى بار لوگيستيكالىق ورتالىقتاردى قوسا العاندا، ءىرى قويما جوبالارىن جۇزەگە اسىردى.