قازاقستان پرەزيدەنتى قاسىم-جومارت توقايەۆ جۇڭگو حالىق رەسپۋبليكاسىنىڭ ءتوراعاسى سي سزينپينگە قۇتتىقتاۋ جەدەلحاتىن جولدادى، دەپ حابارلايدى infohub.kz سايتى.
مەملەكەت باسشىسىنىڭ ءباسپاسوز قىزمەتى ءمالىم ەتكەندەي، قاسىم-جومارت توقايەۆ سي ءسزينپيندى جۇڭگو حالىق رەسپۋبليكاسى قۇرىلعاننان بەرگى 77 جىلدىعىمەن قۇتتىقتادى.
«جاڭارۋ مەن جاڭعىرتۋدىڭ سيمۆولىنا اينالعان بۇل داتا ۇلى جۇڭگو تاريحىندا ەرەكشە ورىن الادى. ءوزىنىڭ بىرەگەي داستۇرلەرى مەن باي مادەنيەتىن ساقتاي وتىرىپ، ءسىزدىڭ ەلىڭىز دامۋ مەن ەكونوميكالىق ورلەۋدىڭ جارقىن ۇلگىسىن كورسەتىپ وتىر. قىتايدىڭ عىلىم، تەحنولوگيا، يننوۆاسيا جانە سيفرلىق ەكونوميكا سالالارىنداعى تاڭعالارلىق جەتىستىكتەرى بۇكىل الەمنىڭ ءتانتى بولۋىن تۋدىرارى ءسوزسىز»، — دەلىنگەن جەدەلحاتتا.
قاسىم-جومارت توقايەۆ دوستىق پەن تاتۋ كورشىلىككە نەگىزدەلگەن ەكى ەل اراسىنداعى ماڭگىلىك جان-جاقتى ستراتەگيالىق سەرىكتەستىك بۇگىندە بۇرىن-سوڭدى بولماعان قارقىنمەن دامىپ كەلە جاتقانىن اتاپ ءوتتى.
سونىمەن قاتار پرەزيدەنت بيىل شانحايدا وتكەن كەزدەسۋ ءوزارا ىنتىماقتاستىقتىڭ كەلەشەگىنە ورتاق كوزقاراستى نىعايتىپ، كوپقىرلى ءوزارا ءىس-قيمىلدىڭ جاڭا بەلەستەرىن اشقانىن ايرىقشا اتادى.
پرەزيدەنت قحر ءتوراعاسىنا جاۋاپتى مەملەكەتتىك قىزمەتىندە تابىس، ال قىتايدىڭ باۋىرلاس حالقىنا اماندىق پەن وركەندەۋ تىلەدى.