قازاقستان پرەزيدەنتى قاسىم-جومارت توقايەۆ بريفينگتە ەلدەگى سيفرلاندىرۋ مەن جاساندى ينتەللەكتتىڭ ءرولى تۋرالى ايتتى، دەپ حابارلايدى infohub.kz.
جۋرناليستەر مەملەكەت باسشىسىنان سيفرلاندىرۋ مەن جاساندى ينتەللەكت قازاقستاندىقتاردىڭ كۇندەلىكتى ومىرىنە قانشالىقتى اسەر ەتىپ جاتقانىن سۇرادى. پرەزيدەنت بيىلعى جىلدىڭ سيفرلاندىرۋ جانە جاساندى ينتەللەكت جىلى دەپ جاريالانعانىن ەسكە سالىپ، بۇل تۋرالى جاڭا جولداۋدا تولىعىراق ايتىلاتىنىن قوستى.
«ءبىز سيفرلىق مەملەكەت — سيفرلىق قىزمەتتەر مەملەكەتىن قۇرۋدىڭ ءبىرىنشى كەزەڭىنەن وتتىك. وزدەرىڭىز كورىپ وتىرسىزدار، باسقا ەلدەرمەن سالىستىرعاندا ءومىر ايتارلىقتاي جەڭىلدەدى. ۇيىڭىزدەن شىقپاي-اق، بۇرىن كوپ ۋاقىت پەن ءتۇرلى مەكەمەلەردى ارالاۋدى قاجەت ەتەتىن كوپتەگەن ىستەردى اتقارا الاسىز. سوندىقتان بۇل — سيفرلىق سەرۆيس مەملەكەتى، بۇل قاجەتتى كەزەڭ. ءقازىر ءبىز ەكىنشى كەزەڭدەمىز، مەن ۇكىمەتكە پرەزەنتاسيالىق كەزەڭدە، حالىقارالىق كەلىسسوزدەر جۇرگىزۋ ساتىسىندا تۇرىپ قالماۋدى تاپسىردىم»، — دەدى قاسىم-جومارت توقايەۆ.
ونىڭ ايتۋىنشا، سيفرلاندىرۋ مەن جاساندى ينتەللەكتتى ادامدارعا، بارلىق قازاقستاندىقتارعا قىزمەت ەتۋگە جۇمىلدىرۋ قاجەت. «قاراپايىم تىلمەن ايتقاندا، سمارتفون — بۇل تەك ويىنشىق ەمەس. سمارتفون — بۇل تەك TikTok كورەتىن قۇرال ەمەس. سمارتفون — اقشا تابۋدىڭ قۇرالى. ماسەلەنى وسىلاي قويۋ كەرەك. بۇل اسىرەسە اۋىل شارۋاشىلىعى وندىرۋشىلەرىنە قاتىستى، ولار ءوز وڭىرلەرىنەن شىقپاي-اق، اۋىلدىق جەردە تۇرىپ، بيزنەس جۇرگىزۋ ءۇشىن زاماناۋي تەحنولوگيانى پايدالانا الادى جانە پايدالانۋى ءتيىس. مىنە، وسى مىندەتتى كەلەسى كەزەڭدە ءبىزدىڭ ۇكىمەت اتقارادى»، — دەپ اتاپ ءوتتى پرەزيدەنت.