قازاقستان پرەزيدەنتى قاسىم-جومارت توقايەۆ توتەنشە جاعدايلار ءمينيسترى شىڭعىس ارينوۆپەن كەزدەسۋ وتكىزدى، دەپ حابارلايدى infohub.kz سايتى.
كەزدەسۋ بارىسىندا مەملەكەت باسشىسى ۆەدومستۆونىڭ جۇمىس قورىتىندىلارى، ازاماتتىق قورعاۋ جۇيەسىن جاڭعىرتۋ بارىسى جانە الداعى كەزەڭگە ارنالعان جوسپارلار تۋرالى باياندامانى تىڭدادى، دەپ حابارلايدى اقوردانىڭ ءباسپاسوز قىزمەتى.
شىڭعىس ارينوۆ ءتجم-نىڭ ماتەريالدىق-تەحنيكالىق بازاسىن نىعايتۋ تۋرالى باياندادى. ونىڭ ايتۋىنشا، سوڭعى ەكى جىلدا بولىمشەلەر 1،4 مىڭنان استام تەحنيكا، اۆياسيا، زاماناۋي قۇتقارۋ جابدىقتارى، ۇشقىشسىز ۇشۋ اپپاراتتارى جانە بايلانىس قۇرالدارىن الدى. بۇل ەل بويىنشا توتەنشە جاعدايلارعا دەن قويۋدىڭ جەدەلدىگىن ايتارلىقتاي ارتتىرۋعا مۇمكىندىك بەردى. سونىمەن قاتار تجم بولىمشەلەرىن رەنوۆاسيالاۋ جۇرگىزىلۋدە.
مينيستر سونداي-اق بولىمشەلەر جەلىسىن دامىتۋ، جاڭا امبەباپ قۇتقارۋ قۇرامالارىن، اۆياسيالىق جانە تەڭىز وتريادتارىن قۇرۋ تۋرالى ايتتى. «اۋىل قۇتقارۋشىلارى» باعدارلاماسى اياسىندا 700-گە جۋىق ەلدى مەكەندى قورعاۋدى قامتاماسىز ەتەتىن 237 ەرىكتى ءورت ءسوندىرۋ بەكەتى سالىندى.
سونىمەن قاتار، حالىقتى توتەنشە جاعدايلاردا جاپپاي حاباردار ەتۋ جۇيەسىن دامىتۋ جالعاسۋدا، جاعداياتتىق ورتالىقتىڭ مۇمكىندىكتەرى كەڭەيتىلۋدە، تابيعي ورتتەردى ەرتە انىقتاۋ جۇيەلەرى ينتەگراسيالانۋدا.
تجم باسشىسى ۆەدومستۆو قىزمەتكەرلەرىن الەۋمەتتىك قولداۋ شارالارى تۋرالى دا اقپارات بەردى. تۇرعىن ءۇي تولەمدەرى قاراستىرىلعان. تجم قىزمەتكەرلەرىنە ارنالعان مامانداندىرىلعان تۇرعىن ءۇي كلاستەرىنىڭ جوباسى ىسكە اسىرىلۋدا، ول ءورت ءسوندىرۋ بولىمدەرى مەن قۇتقارۋ بازالارىنىڭ جانىندا قاجەتتى ينفراقۇرىلىمى بار تۇرعىن ۇيلەردى سالۋدى كوزدەيدى.
پرەزيدەنت مينيسترلىكتىڭ ازاماتتىق قورعاۋ جۇيەسىن جەتىلدىرۋ بويىنشا اتقارىپ جاتقان جۇمىسىن وڭ باعالادى. ول جەرگىلىكتى اتقارۋشى ورگاندارمەن بىرلەسىپ، اۋداندىق جانە اۋىلدىق قۇتقارۋ بولىمشەلەرىنىڭ ماتەريالدىق-تەحنيكالىق بازاسىن نىعايتۋ، زاماناۋي تەحنولوگيالاردى ەنگىزۋ جانە ءورت قاۋىپسىزدىگى دەڭگەيىن ارتتىرۋ جۇمىستارىن جالعاستىرۋدى تاپسىردى.