استانادا تاۋەلسىز مەملەكەتتەر دوستاستىعى ۆولونتەرلەرىنىڭ I فورۋمى باستالدى. ونى وتكىزۋ باستاماسىن قازاقستان پرەزيدەنتى قاسىم-جومارت توقايەۆ كوتەرگەن بولاتىن، ال بۇل شەشىمدى تمد ۇكىمەت باسشىلارى كەڭەسى قولدادى. فورۋم دوستاستىق ەلدەرى اراسىندا ۆولونتەرلىك باستامالاردى بىرىكتىرۋ جانە تاجىريبە الماسۋ الاڭىنا اينالادى، دەپ حابارلايدى infohub.kz سايتى.
سالتاناتتى اشىلۋعا قازاقستان رەسپۋبليكاسى پرەمەر-مينيسترىنىڭ ورىنباسارى – مادەنيەت جانە اقپارات ءمينيسترى ايدا بالاەۆا، بۇۇ ەرىكتىلەر باعدارلاماسىنىڭ اتقارۋشى ديرەكتورى تويلي كۋربانوۆ، ءوقا باس حاتشىسى سارىباي قايرات، تمد باس حاتشىسىنىڭ ورىنباسارى نۇرلان سەيىتوۆ، سونداي-اق ۆولونتەرلىك ۇيىمداردىڭ وكىلدەرى مەن تمد ەلدەرىنىڭ دەلەگاسيالارى قاتىستى.
اشىلۋ سالتاناتى قازاقستان پرەزيدەنتىنىڭ قۇتتىقتاۋ حاتىن وقۋدان باستالدى، ونى ايدا بالاەۆا وقىدى. وندا، اتاپ ايتقاندا: «بۇل ماڭىزدى شارانىڭ قازاقستاننىڭ ۇسىنىسىمەن بۇۇ جاريالاعان حالىقارالىق ەرىكتىلەر جىلىندا ءوتىپ جاتقانى وتە سيمۆولدىق. بۇل ۆولونتەرلەردىڭ كوپتەگەن الەۋمەتتىك، گۋمانيتارلىق جانە ەكولوگيالىق ماسەلەلەردى شەشۋدەگى وراسان زور ءرولىن مويىنداۋ بولىپ تابىلادى.
وسى فورۋمدى وتكىزۋ باستاماسىن كوتەرە وتىرىپ، قازاقستان حالىقارالىق ارەنادا تاجىريبە الماسۋ جانە ۆولونتەرلىك باستامالاردى بىرىكتىرۋ ءۇشىن تمد-نىڭ تۇراقتى جۇمىس ىستەيتىن پلاتفورماسىن قۇرۋدى ماقسات ەتتى. بىزگە دوستىق كوپىرلەرىن قۇرۋعا، ىنتىماقتاستىق، مەيىرىمدىلىك، جاناشىرلىق سەكىلدى قۇندىلىقتاردى نىعايتۋعا ەرەكشە نازار اۋدارۋ ماڭىزدى.
قازاقستاندا ۆولونتەرلىك ادام الەۋەتىن دامىتۋعا، جاۋاپتى ازاماتتىق يدەياسىن ىلگەرىلەتۋگە جانە جاڭا قوعامدىق ەتيكانى قالىپتاستىرۋعا قىزمەت ەتەدى. 1 شىلدەدەن باستاپ ەلىمىزدىڭ تاريحىندا العاش رەت ۆولونتەرلىك قىزمەتكە مەملەكەتتىك قولداۋدى ەڭ جوعارى قۇقىقتىق دەڭگەيدە بەكىتكەن جاڭا كونستيتۋسيا كۇشىنە ەندى.
ەرىكتىلەردىڭ اسىل نيەتتەرى — سارقىلماس شابىت كوزى جانە كۇشتى وزگەرتۋشى كۇش. جارقىن مىسال — «تازا قازاقستان» جالپىۇلتتىق قوزعالىسى. ىزگى باستاما قىسقا مەرزىمدە كوپتەگەن ازاماتتاردى، اسىرەسە بەلسەندى جاستاردى بىرىكتىردى. جالپى، ەرىكتىلەر جىلى اياسىندا مىڭداعان ءىس-شارا وتكىزىلدى، ەلىمىزدەگى ۆولونتەرلەر سانى 300 مىڭ ادامعا جۋىقتادى.
بۇل فورۋم ەلدەرىمىزدىڭ گۋمانيتارلىق ىنتىماقتاستىعىن دامىتۋعا لايىقتى ۇلەس قوسادى، ادامدار اراسىنداعى بايلانىستاردى، سەنىم مەن تاتۋ كورشىلىكتى نىعايتۋعا ىقپال ەتەدى دەپ سەنەمىن. باس ماقسات — دوستاستىقتى قۇرۋ مەن پروگرەسس، بىرلىك پەن ءوزارا تۇسىنىستىك كەڭىستىگىنە اينالدىرۋ.
بارلىق ۆولونتەرلەرگە جاناشىرلىقتارى مەن الەمدى جاقسى جاققا وزگەرتۋگە دايىندىقتارى ءۇشىن شىن جۇرەكتەن العىس بىلدىرەمىن.
فورۋم قاتىسۋشىلارىنا جەمىستى جۇمىس جانە زور ورتاق جەتىستىكتەر تىلەيمىن!» — دەلىنگەن.
ەكى كۇندىك فورۋمعا قازاقستاننان، ءازىربايجاننان، بەلارۋستەن، قىرعىزستاننان، رەسەيدەن، تاجىكستاننان جانە وزبەكستاننان 300-گە جۋىق دەلەگات قاتىسۋدا، ونىڭ ىشىندە مەملەكەتتىك ورگانداردىڭ، ۆولونتەرلىك ۇيىمداردىڭ وكىلدەرى مەن ەرىكتىلەر بار. پانەلدىك سەسسيالار، تاقىرىپتىق پىكىرتالاستار جانە تابىستى ۆولونتەرلىك تاجىريبەلەردىڭ پرەزەنتاسيالارى جوسپارلانعان. مەملەكەتارالىق ىنتىماقتاستىقتى دامىتۋعا جانە ەكولوگيا، الەۋمەتتىك جانە ينكليۋزيۆتى قولداۋ، سونداي-اق جاستار ۆولونتەرلىگى سالاسىنداعى بىرلەسكەن باستامالاردى قالىپتاستىرۋعا ەرەكشە نازار اۋدارىلادى.