قازاقستان پرەزيدەنتى قاسىم-جومارت توقايەۆ تۇرىكمەنستان باسشىلىعىنا ەل تاۋەلسىزدىگىنىڭ 35 جىلدىعىنا وراي قۇتتىقتاۋ جەدەلحاتتارىن جولدادى، دەپ حابارلايدى infohub.kz سايتى.
پرەزيدەنتتىڭ ءباسپاسوز قىزمەتىنىڭ مالىمەتىنشە، قۇتتىقتاۋ جەدەلحاتتارى تۇرىكمەنستان پرەزيدەنتى سەردار بەردىمۇحامەدوۆكە جانە تۇرىكمەن حالقىنىڭ ۇلتتىق كوشباسشىسى، حالىق ماسلاحاتىنىڭ ءتوراعاسى ارقاداع گۋربانگۋلى بەردىمۇحامەدوۆكە ارنالعان.
مەملەكەت باسشىسى باۋىرلاس تۇرىكمەنستاننىڭ بۇل مەرەكەنى بەدەلدى، دامىعان مەملەكەت مارتەبەسىندە قارسى الىپ وتىرعانىن اتاپ ءوتتى. ونىڭ جەتىستىكتەرىنىڭ نەگىزىندە تۇرىكمەن حالقىنىڭ كەلىسىمى مەن بىرلىگى، باي مادەنيەتى جانە جاسامپاز رۋحى جاتىر.
«تاۋەلسىزدىك جىلدارىندا ەلىڭىز الەۋمەتتىك-ەكونوميكالىق جاڭعىرۋدا، ازاماتتاردىڭ ءال-اۋقاتىن ارتتىرۋدا ايتارلىقتاي تابىستارعا قول جەتكىزىپ، ءپوزيتيۆتى بەيتاراپتىق قاعيداتتارىندا بەرىك تۇرعان مەملەكەت رەتىندە حالىقارالىق ۇستانىمىن نىعايتتى. قازاقستان تۇرىكمەنستانمەن دوستىق قارىم-قاتىناستى جوعارى باعالايدى، تاتۋ كورشىلىك پەن ءوزارا قولداۋ رۋحىنداعى كوپقىرلى ىنتىماقتاستىقتى نىعايتۋعا زور ءمان بەرەدى»، — دەلىنگەن قۇتتىقتاۋدا.
قازاقستان پرەزيدەنتى تۇرىكمەنستان باسشىلىعىنا مەملەكەتتىك قىزمەتتە جاڭا جەتىستىكتەر، ال باۋىرلاس تۇرىكمەن حالقىنا يگىلىك پەن وركەندەۋ تىلەدى.