قازاقستان پرەزيدەنتى قاسىم-جومارت توقايەۆ ۇلتتىق بانك ءتوراعاسى تيمۋر سۇلەيمەنوۆتىڭ 2026 جىلعى قاڭتار-شىلدە ارالىعىنداعى اقشا-كرەديت ساياساتىنىڭ قورىتىندىلارى تۋرالى ەسەبىن تىڭدادى، دەپ حابارلايدى infohub.kz سايتى.
مەملەكەت باسشىسىنا ەكونوميكاداعى احۋال، ىسكەرلىك بەلسەندىلىك، ينفلياسيا فاكتورلارى جانە باعانى تۇراقتاندىرۋ شارالارى تۋرالى باياندالدى. ۇلتتىق بانكتىڭ دەرەكتەرىنە سايكەس، جىلدىق ينفلياسيا قاتارىنان ونىنشى اي بويى تومەندەپ، شىلدەدە 10،2 پايىزدى قۇرادى.
اقوردادا اتاپ وتكەندەي، بۇعان جۇرگىزىلىپ جاتقان اقشا-كرەديت ساياساتى، تەڭگەنىڭ باعامىنىڭ نىعايۋى، تۇتىنۋ بەلسەندىلىگىنىڭ تۇراقتانۋى، سونداي-اق ۇكىمەت پەن ۇلتتىق بانكتىڭ بىرلەسكەن ينفلياسياعا قارسى شارالارى ىقپال ەتتى.
توقاەۆقا ەكونوميكانى نەسيەلەندىرۋ ديناميكاسى تۋرالى دا باياندالدى. بانكتەردىڭ بيزنەسكە بەرگەن نەسيەلەرى بويىنشا قارىز پورتفەلى 1 شىلدەدەگى جاعداي بويىنشا جىلدىق ماندە 17،1 پايىزعا ءوستى، ال شاعىن جانە ورتا بيزنەستى نەسيەلەندىرۋ قارقىنى 29،6 پايىزعا دەيىن جەدەلدەدى.
سونىمەن قاتار، تۇتىنۋ نەسيەلەرىنىڭ ءوسۋى جىل باسىنداعى 21 پايىزدان 13 پايىزعا دەيىن باياۋلادى. اقوردادا بۇل قابىلدانعان پرۋدەنسيالدىق شارالاردىڭ ارەكەتىمەن جانە تۇتىنۋ نەسيەلەرى قارقىنىنىڭ قالىپقا كەلۋىمەن بايلانىستىردى. ناتيجەسىندە نەسيە رەسۋرستارى بيزنەستى قارجىلاندىرۋ پايداسىنا قايتا بولىنۋدە.
پرەزيدەنتكە سونداي-اق ۆاليۋتا نارىعى، ۇلتتىق قور مەن بجزق اكتيۆتەرى، ەلدىڭ التىن-ۆاليۋتا رەزەرۆتەرى تۋرالى دەرەكتەر ۇسىنىلدى. 1 شىلدەدەگى جاعداي بويىنشا ۇلتتىق قور مەن التىن-ۆاليۋتا رەزەرۆتەرىنىڭ جيىنتىق كولەمى 127،3 ملرد دوللاردى قۇرادى.
ۇلتتىق قوردىڭ ءبىرىنشى جارتىجىلدىقتاعى ينۆەستيسيالىق كىرىسى 2،3 ملرد دوللارعا جەتتى. بجزق زەينەتاقى اكتيۆتەرى 27،8 ترلن تەڭگەنى قۇراپ، جىل باسىنان بەرى 1،7 ترلن تەڭگەگە ءوستى.
Alatau City قارجى ەكوجۇيەسىنىڭ دامۋى بولەك تالقىلاندى. ۇلتتىق بانك كاپيتال قوزعالىسىن جەدەلدەتۋ مەن جەڭىلدەتۋگە، سونداي-اق قالانى دامىتۋعا ينۆەستيسيا تارتۋعا باعىتتالعان شارالاردى ازىرلەدى.
توقاەۆقا سيفرلىق قارجى اكتيۆتەرى جانە ۇلتتىق سيفرلىق قارجى ينفراقۇرىلىمى سالاسىنداعى تاپسىرمالاردىڭ ورىندالۋى تۋرالى دا باياندالدى. جاڭا باعىتتاردىڭ قاتارىندا — ترانسشەكارالىق تولەمدەر ءۇشىن ستەيبلكويندەردى پايدالانۋ، ءتيىستى ينفراقۇرىلىمدى دامىتۋ جانە توكەنيزاسيالانعان مەملەكەتتىك اكتيۆتەردى شىعارۋ.
سونىمەن قاتار، تولەم نارىعىندا جاڭا سەگمەنت — ءبىرىنشى ساناتتاعى ليسەنزيالاناتىن تولەم ۇيىمدارى پايدا بولدى. اقوردانىڭ دەرەكتەرىنشە، بۇل باسەكەلەستىكتى كۇشەيتىپ، كليەنتتەردىڭ شىعىندارىن ازايتىپ، حالىق پەن بيزنەستىڭ سيفرلىق قارجى قىزمەتتەرىنە قولجەتىمدىلىگىن كەڭەيتۋى ءتيىس.
19 شىلدەدەن باستاپ ۇلتتىق تولەم جۇيەسى اياسىندا كەز كەلگەن بانك كليەنتتەرى اراسىندا QR-تولەمدەر مەن تەلەفون ءنومىرى بويىنشا اۋدارىمدار ىسكە قوسىلدى. ىسكە قوسىلعان ساتتەن باستاپ 6،5 ملن وپەراسيا 170 ملرد تەڭگە سوماسىنا وڭدەلدى.
«ۇلتتىق بانك باعا تۇراقتىلىعىن قامتاماسىز ەتۋ جانە ينفلياسيا بويىنشا 5 پايىزدىق ورتا مەرزىمدى ماقساتقا قول جەتكىزۋ ءۇشىن بارلىق قاجەتتى شارالاردى قابىلداۋدا»، — دەدى سۇلەيمەنوۆ.
كەزدەسۋ قورىتىندىسى بويىنشا توقايەۆ ۇلتتىق بانك الدىنا ءبىرقاتار مىندەت قويىپ، ينفلياسيانى ودان ءارى تومەندەتۋ مەن تۇراقتاندىرۋدىڭ ماڭىزدىلىعىن اتاپ ءوتتى.
بۇعان دەيىن «كۋرسيۆ» قازاقستانداعى جىلدىق ينفلياسيا شىلدەدە 10،3 پايىزدان 10،2 پايىزعا باياۋلاعانىن، ال ءبىر اي ىشىندە باعانىڭ ماۋسىمداعى 0،8 پايىزعا قارسى 0،6 پايىزعا وسكەنىن جازعان بولاتىن. ۇلتتىق ستاتيستيكا بيۋروسىنىڭ دەرەكتەرىنە سايكەس، ديناميكاعا كوكونىس پەن جەمىس-جيدەك باعاسىنىڭ ماۋسىمدىق تومەندەۋى دە اسەر ەتتى.