قازاقستان حالىق كەڭەسىنىڭ ءبىرىنشى سەسسياسىندا پرەزيدەنت قاسىم-جومارت توقايەۆ ەلىمىزدىڭ ازاماتتارى كۇڭىرەنىپ، تاريحتان كىنالى ىزدەۋگە سالىنباۋى كەرەكتىگىن ايتتى، دەپ حابارلايدى infohub.kz سايتى.
«تاريحتى دۇرىس ءتۇسىنۋ — ەڭ ماڭىزدى قابىلەتتەردىڭ ءبىرى. وتكەنگە وكپەلەۋ — بولاشاقتان ايىرىلۋمەن تەڭ. اينالاسىنان ۇنەمى كىنالى ىزدەپ، ءوز ساتسىزدىكتەرىنە سىلتاۋ تابۋعا تىرىساتىن ادامدى نە بۇكىل حالىقتى قانداي بولاشاق كۇتىپ تۇر؟ مۇنداي ەسكىرگەن ادەتتەردەن ارىلۋ قاجەت. كۇندەلىكتى ومىردە دە كۇڭىرەنبەي، رۋح سەرگەكتىگىن جانە وزىنە دەگەن سەنىمدى ساقتاۋ كەرەك. ءوسىپ كەلە جاتقان ۇرپاقتى جۇرەكسىزدىكتەن، بارىنەن كىنالى ىزدەۋ بەيىمدىلىگىنەن جانە شامادان تىس ۇرەيلەنۋدەن ساقتاۋىمىز كەرەك. ولار ءوز حالقىنىڭ تاريحىمەن ماقتانىپ، ەلىمىزدىڭ بولاشاعىنا سەنىممەن قاراۋى ءتيىس»، — دەدى قاسىم-جومارت توقايەۆ.
ول جازۋشى مۇحتار اۋەزوۆتىڭ «مىقتى مەملەكەت قۇرعىڭ كەلسە — بالا تاربيەسىنەن باستا» دەگەن ءسوزىن ەسكە سالىپ، «ادال ازامات» تاربيە باعدارلاماسىنىڭ جۇزەگە اسىرىلىپ جاتقانىن اتاپ ءوتتى.
«قازاق حالقىنىڭ باسىنان نەبىر اۋىر سىناقتار ءوتتى، ءبىراق ولار ونىڭ رۋح قۋاتىن، توزىمدىلىگىن، قايسارلىعىن جانە ومىرگە دەگەن قۇلشىنىسىن سىندىرا المادى. ءبىز اتا-بابا ءداستۇرىن، ءدىنىمىزدى، انا ءتىلىمىزدى جانە وزىندىك بولمىسىمىزدى ساقتاي وتىرىپ، جاڭاشىلدىق پەن جاسامپازدىققا ۇمتىلۋىمىز كەرەك. بۇكىل حالقىمىزعا كولەڭكە تۇسىرەتىن جات اعىمداردى، سونداي-اق قاراڭعىلىق پەن ناداندىقتان باسقا ەشتەڭە اكەلمەيتىن ەسكىرگەن تۇسىنىكتەردى باتىل توقتاتۋ قاجەت. بىزگە ۇلت رەتىندە ۇيىسىپ، قوعامدا جاڭا ەتيكا قالىپتاستىرۋ قاجەت. سىزدەر — قازاقستان حالىق كەڭەسىنىڭ مۇشەلەرى — وسى اسا ماڭىزدى مىندەتتى ورىنداۋعا سالماقتى ۇلەس قوساسىزدار دەپ سەنەمىن»، — دەپ قوستى توقايەۆ.