قازاقستان پرەزيدەنتى قاسىم-جومارت توقايەۆ تايلاند كورولى ماحا ۆاچيرالونگكورنعا تۋعان كۇنىنە وراي قۇتتىقتاۋ جەدەلحاتىن جولدادى، دەپ حابارلايدى infohub.kz سايتى.
جولداۋىندا مەملەكەت باسشىسى بۇل مەرەكەنىڭ بۇكىل تاي حالقى ءۇشىن ەرەكشە ماڭىزىن اتاپ ءوتىپ، ونىڭ كورولدىكتىڭ تۇراقتى دامۋى، ۇلتتىق مۇراسى جانە رۋحاني قۇندىلىقتارىنىڭ سيمۆولى ەكەنىن ايتتى.
قاسىم-جومارت توقايەۆ قازاقستاننىڭ دوستىق پەن ءوزارا قولداۋ بايلانىستارىنا نەگىزدەلگەن ەكىجاقتى ىنتىماقتاستىقتى ودان ءارى كەڭەيتۋ نيەتىن راستادى. سوڭىندا قازاقستاندىق كوشباسشى كورولگە جاۋاپتى جۇمىسىندا تابىس، ال دوستىق تايلاند حالقىنا اماندىق پەن گۇلدەنۋ تىلەدى.
بيىلعى جىلدىڭ شىلدە ايىنىڭ ورتاسىندا توقايەۆ تايلاند پرەمەر-مينيسترى انۋتين چارنۆيراكۋلمەن كەلىسسوز جۇرگىزدى. كەزدەسۋدە پرەزيدەنت كورولدىكتى قازاقستاننىڭ وڭتۇستىك-شىعىس ازياداعى نەگىزگى سەرىكتەستەرىنىڭ ءبىرى رەتىندە قاراستىراتىنىن اتاپ ءوتتى. تايلاند قازاقستاندىق تۋريستەردىڭ ەڭ تانىمال باعىتتارىنىڭ قاتارىنا كىرەدى: تەك 2025 جىلى ەلگە 150 مىڭنان استام ازامات بارعان.
انۋتين چارنۆيراكۋل ءوز كەزەگىندە تايلاندتىڭ قازاقستانمەن كەڭ اۋقىمدى ماسەلەلەر بويىنشا ىنتىماقتاستىقتى ارتتىرۋعا مۇددەلى ەكەنىن مالىمدەدى. اڭگىمە سوڭىندا پرەزيدەنت تايلاند تۇرعىندارىن قىستا قازاقستاندا دەمالۋعا شاقىردى. بۇعان دەيىن توقاەۆتى كامبودجاعا بارۋعا شاقىرعانى حابارلانعان بولاتىن.