توكيوداعى حانەدا اۋەجايىندا 200-گە جۋىق ءتىرى كەسىرتكەنى زاڭسىز اكەلمەك بولعان 23 جاستاعى مەكسيكا ازاماتى دانيەل يسااك ۆەلاسكو بالتازار ۇستالدى. ول ولاردى ش ۇلىقتار مەن فۋتبولكالارعا جاسىرعان، دەپ حابارلايدى infohub.kz سايتى.
جولاۋشى وڭتۇستىك كورەيادان كەلگەن. كەدەن قىزمەتكەرلەرى ونىڭ چەمودانىن تەكسەرۋ بارىسىندا 22 جۇپ ش ۇلىققا سالىنىپ، فۋتبولكالارعا ورالعان باۋىرىمەن جورعالاۋشىلاردى تاپتى. جانۋارلاردىڭ بىرەۋى تاسىمالداۋعا شىداماي ءولىپ قالدى.
The Times of India پورتالىنىڭ جازۋىنشا، ىقتيمال كونتراباندا تۋرالى بەلگى پوليسياعا الدىن الا تۇسكەن، سودان كەيىن اۋەجاي قىزمەتكەرلەرى جوعارى دايىندىق رەجيمىنە كوشىرىلگەن.
تاركىلەنگەن باۋىرىمەن جورعالاۋشىلاردىڭ ىشىنەن ساراپشىلار كەمىندە توعىز اعاش ابرونياسىن انىقتادى، ولاردى مەكسيكالىق الليگاتور كەسىرتكەلەرى دەپ تە اتايدى. بۇل ءتۇر جويىلىپ بارا جاتقاندار قاتارىندا، ال ونىڭ حالىقارالىق ساۋداسى قاتاڭ شەكتەلگەن.
كۇدىكتى كىناسىن مويىنداپ، كەسىرتكەلەردى مەكسيكادا ءبىر داناسىن 3،5-تەن 4،7 دوللارعا ساتىپ العانىن، ولاردى جاپونياداعى كورمەدە قايتا ساتۋدى جوسپارلاعانىن ءتۇسىندىردى. وندا جەكەلەگەن دانالاردىڭ قۇنى 630 دوللارعا جەتۋى مۇمكىن.
ۇستالعان ادامعا قاتىستى كەدەن زاڭناماسىن بۇزۋ جانە سيرەك كەزدەسەتىن تۇرلەردى زاڭسىز اكەلۋ فاكتىسى بويىنشا تەرگەۋ باستالدى. ۋاكىلەتتى ورگاندار قالعان تاركىلەنگەن باۋىرىمەن جورعالاۋشىلاردىڭ ءتۇرىن انىقتاۋدى جالعاستىرۋدا.