قازاقستان رەسپۋبليكاسىنىڭ ۇلتتىق وليمپيادالىق كوميتەتى 2026 جىلعى ازيا ويىندارىندا مارافوندىق سپورتتىق جۇرىستە مارەگە ءبىرىنشى بولىپ جەتكەن ياسمينا توكسانباەۆانىڭ ديسكۆاليفيكاسيالانۋ سەبەپتەرىن ءتۇسىندىردى. نەگىز رەتىندە سپورتشىنىڭ اياق كيىمىنىڭ ۇلگىسى دۇنيەجۇزىلىك جەڭىل اتلەتيكا قاۋىمداستىعى (World Athletics) بەكىتكەن تىزىمگە سايكەس كەلمەۋى اتالدى، دەپ حابارلايدى infohub.kz سايتى.
27 قىركۇيەكتە توكسانباەۆا ازيادا-2026-دا جەڭىسكە جەتىپ، مارافوندىق سپورتتىق ءجۇرىس قاشىقتىعىن 3 ساعات 22 مينۋت 20 سەكۋند ناتيجەمەن ءبىرىنشى بولىپ ەڭسەردى. قازاقستاندىق سپورتشى جاقىن قارسىلاسىنان شامامەن ءتورت مينۋت وزىپ، باستاپقىدا جارىس جەڭىمپازى دەپ جاريالاندى.
مارەگە جەتكەننەن كەيىن تەحنيكالىق دەلەگاتتار ەرلەر مەن ايەلدەر تۋرنيرلەرىنىڭ ءۇش جۇلدەگەرىنىڭ اياق كيىمىن تەكسەردى. توكسانباەۆانىڭ كروسسوۆكا ۇلگىسى World Athletics ماقۇلداعان تىزىمدە جوق ەكەنى انىقتالدى. اياق كيىمنىڭ سۋرەتتەرى مەن قاجەتتى اقپارات حالىقارالىق فەدەراسياعا جىبەرىلىپ، رەسمي قورىتىندى الىنعانشا ماراپاتتاۋ ءراسىمى كەيىنگە شەگەرىلدى.
كەيىن World Athletics قازاقستاندىق سپورتشى پايدالانعان ۇلگىنىڭ قولدانىستاعى تالاپتارعا سايكەس كەلمەيتىنىن راستادى. حالىقارالىق فەدەراسيانىڭ ەرەجەلەرىنە سايكەس، مۇنداي جاعدايدا سپورتشىنىڭ ناتيجەسى جارامسىز دەپ تانىلىپ، جارىستىڭ قورىتىندى حاتتاماسى تۇزەتىلەدى.
جارىس اياق كيىمىنە قويىلاتىن تالاپتار World Athletics كەڭەسىنىڭ 2026 جىلعى 19 ناۋرىزداعى شەشىمىمەن جاڭارتىلىپ، 20 ساۋىردە كۇشىنە ەندى. ق ر ۇوك ناقتىلاعانداي، وزگەرىستەر تۋرالى اقپارات بارلىق ۇلتتىق فەدەراسيالارعا جىبەرىلگەن.
وسىنداي جاعداي اعىمداعى ازيادادا بۇعان دەيىن دە ورىن العان. يراندىق جەتىسايىسشى فاتيما موحيتزادەنىڭ ناتيجەسى دە رۇقسات ەتىلگەن تىزىمگە كىرمەگەن اياق كيىم ۇلگىسىنە بايلانىستى جويىلدى. حاتتاما قايتا قارالعاننان كەيىن قازاقستاندىق الينا چيستياكوۆا ءتورتىنشى ورىننان ءۇشىنشى ورىنعا كوتەرىلىپ، قولا مەدال الدى.
ق ر ۇوك World Athletics، ازيالىق جەڭىل اتلەتيكا قاۋىمداستىعى، ازيا وليمپيادالىق كەڭەسى جانە قازاقستان جەڭىل اتلەتيكا فەدەراسياسىمەن ىنتىماقتاستىقتى جالعاستىرىپ جاتقانىن حابارلادى. تاراپتار اپەللياسيا بەرۋ مۇمكىندىگىن دە قاراستىرۋدا.