اڭىزعا اينالعان Top Gear اۆتوكولىك شوۋى رەسمي تۇردە ەكرانعا ورالادى. BBC تەلەكومپانياسى ءتورت جىلعا جۋىق ۋاقىتقا توقتاتىلعان جوبانىڭ قايتا جانداناتىنىن راستادى. بۇل تۋرالى infohub.kz سايتى حابارلايدى.
بۇل اقپاراتتى BBCء-دىڭ ويىن-ساۋىق باعىتىنىڭ ديرەكتورى ەد حاۆارد ەدينبۋرگ تەلەفەستيۆالىندەگى پانەلدىك پىكىرتالاس بارىسىندا ايتتى، دەپ حابارلايدى Guardian. ەسكە سالايىق، باعدارلاما 2022 جىلى جۇرگىزۋشى ەندريۋ فلينتوفف ءتۇسىرىلىم الاڭىندا اپاتقا ۇشىراعاننان كەيىن توقتاتىلعان ەدى. ول ءۇش دوڭگەلەكتى كولىكتە اۋدارىلىپ، بەتىنەن اۋىر جاراقات العان بولاتىن.
جاڭا جۇرگىزۋشىنىڭ ەسىمى قۇپيا ساقتالۋدا. حاۆاردتان كوميك ءارى اۆتوكولىك اۋەسقويى دجيممي كارردىڭ كانديداتۋراسى تۋرالى تىكەلەي سۇراق قويىلدى. «بۇگىن مەن تالانتتار تۋرالى ايتپايمىن. دجيممي تاماشا جۇرگىزۋشى بولار ەدى، ءبىراق بۇگىن مەن بۇل تاقىرىپتى تالقىلامايمىن»، — دەپ حاۆارد تىكەلەي جاۋاپ بەرۋدەن جالتاردى.
كارردان بولەك، شوۋعا جۇرگىزۋشى رەتىندە باسقا دا مەديا تۇلعالاردى بولجاپ ءجۇر: دجو مارلەر — انگليا قۇراماسىنىڭ بۇرىنعى رەگبي ويىنشىسى جانە Celebrity Traitors رەاليتي-شوۋىنىڭ جۇلدىزى؛ دجودي كيدد — سۋپەرمودەل ءارى اۆتوكولىك جارىسشىسى، Top Gear-دا بىرنەشە رەت كورىنىپ، يتالياداعى جارىستارعا قاتىسقان؛ گوردون رامزي — اتاقتى اسپاز، باعدارلامانىڭ قوناعى بولعان جانە سۋپەركارلاردىڭ اسەرلى كوللەكسياسىنا يە؛ روۋەن اتكينسون — كۋلتتىك اكتەر ءارى قۇمار اۆتوكولىك اۋەسقويى، باعدارلامانىڭ 17-ماۋسىمىندا اينالىم ۋاقىتىن 1 مينۋت 42،2 سەكۋند كورسەتىپ، سول كەزدەگى اتاقتى ادامدار اراسىنداعى تۋرنيرلىك كەستەنى باستاعان.
Top Gear BBCء-دىڭ ەڭ تابىستى جوبالارىنىڭ ءبىرى سانالادى. شوۋ ەڭ ۇلكەن تانىمالدىلىققا 2002 جىلى دجەرەمي كلاركسون، ريچارد حامموند جانە دجەيمس مەيمەن قايتا ىسكە قوسىلعاننان كەيىن يە بولدى. سودان بەرى ارنايى شىعارىلىمداردى قوسقاندا 240 ەپيزود پەن 33 ماۋسىم جارىق كوردى. سوڭعى ەپيزود 2022 جىلدىڭ 18 جەلتوقسانىندا كورسەتىلدى.
بۇعان دەيىن Kursiv LifeStyle دجەرەمي كلاركسونعا قاتەرلى ىسىك دياگنوزى قويىلعانىن جازعان بولاتىن.