اۆتورى:
عابيدەن قوجاحمەت،
قىزىلوردا قالاسى

توسىنەن ۇشقان تۇلەكتىڭ
ارمانى بيىك بولعان جەر!

(قازالى اۋدانى، №25 ورتا مەكتەبى جايىندا جازىلعان)
بولە - جارماي ءبىرىن دە شەتكە دارا،
بەردىڭ بە ەكەن قاشاندا كوپكە باعا.
قاي قيىردا جۇرسە دە شاكىرتتەرىڭ،
سەن ولارعا ورتاقسىڭ، مەكتەپ - انا.

قازىرگى ورتا مەكتەپتىڭ ىرگەتاسى 1947 - 48 وقۋ جىلىندا قالانعان. 49 - جىلى ومىرگە ءوزىنىڭ العاشقى تۇلەكتەرىن بەردى. وتكەن تاريحىنداعى تۇلەكتەرى اراسىندا مەكتەپتى 7 تۇلەگى التىن مەدالعا، 4 تۇلەگى كۇمىس مەدالعا ءبىتىرىپ شىققان.

ەلدىڭ ءبىر سالتى قاشاننان -
ونەرمەن باعى جانعان جەر.
توسىنەن ۇشقان تۇلەكتىڭ
ارمانى بيىك بولعان جەر.
ۇلاعاتتىڭ ۇلگىسىن
مەكتەبى جيىپ العان جەر.
سارقىلماس ءبىلىم بايلىعى -
ءتالىم مەن تانىم قونعان جەر.

***
مەكتەپتىڭ داڭعىل جولى بار
اۋماعان بەينە داستاننان.
قوجاباي، اياپ، مولداباي،
ىسكەندىر، امانگەلدىلەر
ءبىر كەزدە - داعى باسقارعان.
سۇراسا بىلسەڭ ءارقايسىسىن،
مىنەزىن ايتىپ قوشتار جان.
مەكتەپتىڭ جولى باستالار
وسىنداي - داعى اسقاردان.

وسىلاي - داعى تولقىتىپ،
ۇستازعا بەرسەك باعانى -
دەربىسالى، ءالىمجان
ەل ەسىندە قالادى.
قۋانىش پەنەن جاربولات
ورلەتكەن شاكىرت تالابىن.
جۇمامۇرات، اقبەرگەن -
ۇمىتپاس شاكىرت سانالى.

مەكتەپپەن بىرگە جاساسقان
جانيەت پەنەن نۇعىمان.
تاجىمبەتتەي ۇستازىڭ
ورىس ءتىلىن تانىعان.
شاپەش، ايناش، بالجاندار
بالاعا كەلگەن باعىنان.
ۇستازدار بار وسىنداي
تابىلعان ءبىلىم جانىنان.

جاقسى ۇستاز قاشاندا
مەكتەبىڭنىڭ كەمەرى.
ءجاندىلدانى ەل بىلەر
ءازىل ءسوزدىڭ شەبەرى.
ءسابيت پەنەن ەسىركەپ
بالاعا بار - دى بەرەرى.
اقنيەت پەنەن جانۇزاق،
ايتاتىن ۇستاز كوپ ەدى.

ماقتاۋلى ۇستاز كوپ ەدى
ىسىمەنەن ناندىرار.
ەل ايتسا سونىڭ بارلىعىن،
ايتۋشىڭ تاڭدى تاڭعا ۇرار.
بىلىمىنە شولىركەپ،
قاشاننان - اق جان قۇمار
شاكىرتتەر شىقتى الدىنان
ايىزىڭدى قاندىرار.

اينۇر مەنەن توقبولات،
الدانياز، شاپايدىڭ
عىلىمدا بولدى تالابى،
بەگالىداي عالىمدار -
مەديسينا مامانى.
دالەنوۆتەر وتباسىن
عىلىم - ءبىلىم جولىندا
ۇلگى ەتىپ شاكىرت قارادى.
الپىسپاي، ءابي، الماستار
مەكتەپتى التىن، كۇمىسكە
العاشقى بولىپ بىتىرگەن
تۇلەكتەر ەدى سانالى.
نۇرپەرزەنت پەن سەكسەنباي،
جەتىسكەندەي اقىندار
ءباسپاسوز اتتى مايداندا
قولىنان تۇسپەدى قالامى.
سەيىل، انەس، مەشىتباي
جىرداعى شىققان جۇيرىكتەر،
مۇشەسى ەدى وداقتىڭ،
ولەڭدە بولعان دارالى.
كوكىرەگى تولى كومبەگە،
تاريحشى ۇستاز ءارى اقىن،
قۇرمەت تۇتتى ورتاسى
اقانجان سىندى اعانى.
اسىل ءسوزدىڭ سىرىنان
شاكىرتكە ءتالىم ۇيرەتكەن
فايزوللاداي اقىندار -
بولمىسى بولعان باعالى.
وسىنداي العى بۋىننىڭ
ىزىمەن تالاي تۇلەكتەر
تاريحىندا مەكتەپتىڭ
جازىلىپ ءالى - اق قالادى.

ايتا بىلسەك وسىنى،
شاكىرتكە بار ءالى سىن.
مەكتەبىنىڭ وتكەنىن،
تاريحىن ءبىلىپ، تانىسىن.
ماقتاۋلى شىقسىن شاكىرتتەر
ءومىردىڭ كورىپ جارىسىن.
كوتەرە بەرسىن ءار جەردە
مەكتەبىنىڭ نامىسىن!