Toyota-نىڭ امەريكاندىق بولىمشەسى 508،3 مىڭ گيبريدتى Camry سەداندارىن كەرى قايتارۋ تۋرالى حابارلادى. سەبەپ — پريبورلار پانەلىنىڭ باعدارلامالىق قامتاماسىز ەتىلۋىندەگى اقاۋ، ول ماڭىزدى ەسكەرتۋ سيگنالدارىنىڭ ءوشىپ قالۋىنا اكەلۋى مۇمكىن، دەپ حابارلايدى infohub.kz سايتى.
كەرى قايتارۋ ناۋقانى اقش نارىعىندا ساتىلعان 2025–2026 جىلعى گيبريدتى Toyota Camry ۇلگىلەرىن قامتيدى. انىقتالعانداي، قوزعالتقىش ىسكە قوسىلعاندا پريبورلار پانەلىنىڭ ديسپلەيى دۇرىس جۇمىس ىستەمەۋى مۇمكىن، بۇل جۇرگىزۋشىنىڭ اپاتتىق سيگناليزاسيا، بۇرىلىس كورسەتكىشتەرى، قاۋىپسىزدىك بەلدىگىن تاقپاعاندىعى تۋرالى ەسكەرتۋ، سونداي-اق Smart Key كىلتى تۋرالى ەسكە سالۋدى كورمەۋىنە اكەلۋى مۇمكىن. اقش-تىڭ جول قوزعالىسى قاۋىپسىزدىگى ۇلتتىق باسقارماسىنىڭ (NHTSA) باعالاۋىنشا، بۇل اقاۋ اپات نەمەسە جاراقات الۋ ءقاۋپىن ارتتىرادى.
ماسەلە پريبورلار پانەلىنىڭ باعدارلامالىق قامتاماسىز ەتىلۋىندە. كەرى قايتارىلعان اۆتوموبيلدەردىڭ يەلەرىنە اقاۋدى جويۋ ءۇشىن تولەۋگە تۋرا كەلمەيدى: Toyota ديلەرلەرى ديسپلەيدىڭ باعدارلامالىق قامتاماسىز ەتىلۋىن تەگىن جاڭارتادى. رەسمي حابارلامالاردا تەك امەريكاندىق نارىقتا ساتىلعان كولىكتەر تۋرالى ايتىلادى.
بۇل ناۋقاننىڭ قازاقستاندا ساتىلعان Toyota اۆتوموبيلدەرىنە قاتىستى ما ەكەنى ازىرگە ناقتىلانباي وتىر. دەگەنمەن، امەريكاندىق «كامري» يەلەرى ءوز كولىكتەرىنىڭ كەرى قايتارۋ تىزىمىنە ەنىپ كەتكەنىن تەكسەرگەنى ءجون.
بۇعان دەيىن Toyota 20 جاسقا دەيىنگى اۆتوموبيلدەردى جاڭارتۋعا رۇقسات بەرگەنى حابارلانعان بولاتىن.